Serokwezîrê tirk Bînalî Yildirim û tayî sermîyananê dewleta tirk rojanê peyinan de îdîayekê eştî werte ke ‘PKK înan rê seweta viraştişê pêdîyayînan xeber rûsnaya û waşto ke eve dewlet ra qisey bikirê’. Nê îdia û vatenê rayveranê tirk raştê nêrazîbîyayişanê tûnî yê Hereketê Azadî yê Kurd ame.
Îmajê ‘AKP quwetîn a’ virazenê
Hemserokîna Konseyê Rayverîn ê KCK eve jû damûstayîn nê îdiayê rayverîna dewlet zûrî vetî. KCK îdiayê serokwezîr û rayveranê tirk zey leteyê propaganda ya lejê taybet û psîkolojîk hesibna û wina vat: “Vatenê zey PKK serva pêdîyayiş mesaj rûsnaya zûrê yê. Bi nê vatenan wazenê, binkewtişê xo binimnê û îmajê ‘PKK derbeyê girdî werdo, îxtidara AKP quwetîn a’ akerê.”
KCK ard ziwan ke heta ke bîyayişê kurdan qebûl mebo, iyê qe jew quwet ra pêdîyayînî mevirazê û wina dewam kerd: “Wa şarê ma nay bizano, ma îxtidar o ke wazeno hereketê azadî yê kurd tesfîye bikero û sîstemê faşîst û otorîter rono mûxatab nêgênê. Ma tenîya bi îktîdarê wayirê zîhniyetê demokrasî û biwaze mesele bi raya demokrasî çareser bikerê, pêdîyayînan virazenê.”
Tekoşîna demokrasî berz bikerime
Hemserokîn vist vîrî ke sermîyanê dewlet mutabaqatê Dolmabahçe red kerdo û mase welişnayo û va: “Helbet Rayver Apo û Hereketê Azadî serva çareserîyê siyasî, fedekarî kerdo. La belê AKP tenîya zey hacet nezdîyê Rayver Apo bîya. Wasto pêdîyayînan bikero hacetê quwetkerdişê xo. Nika zî siyasetê lejî ramenê. Bi xo vanê ‘hetanî teslîm nêgîrê, lej do biramo’. Eynî wext de dişmenînê Rojawa kenê. Êrişê vera kurdan û quwetanê demokrasî yê Tirkîye zî damûsnenê ke nîyetê AKP ê çareserîn çinîyo. Coka heta ke wastenê weşîya demokratîk û azad ê kurdan qebûl mebo, Hereketê Azadî yê Kurd, kesî ra pêdîyayin nêvirazneno. Ma dê destûr nêdê AKP ke şarî bixapîno.”
KCK heme Kurdistanij û quwetanê demokrasî ra wast ke, goş medê zûrîyanê AKP û pawitişê pûçî nêpawê û tekoşîna azadî û demokrasî berz bikirê.