Sala par ji aliyê şaredariya navçeya Milazgirê ya Mûşê, Mala Piştgiriya Perwerdehiyê ya Orhan Dogan hat vekirin û li vir 342 xwendevan ders dibînin. Li nava hefteyê û dawiya hefteyê ders tên dayîn û di serî de perwerdehiya zimanê Kurdî û di gelek beşên din ders tên dayîn. Bi taybet jî dersên Kurdî rastî eleqeya welatiyan tên. Şaredarê Milazgirê M. Nurî Balci anî ziman ku ji bo piştgiriyê bidin xwendevanên ku rewşa wan ya aboriyê nebaşe, Mala Piştgiriya Perwerdehiyê vekirine.

Şaredar Balci wiha axivî: "Mala piştgiriya perwerdehiyê dersxaneya herî baş ya herêmê ye. Ji ber vê yekê divê xwendevan li ser dersan rawestin û cidî nêzî karê xwe bibin. Mebesta me ew e ku em nifşekî xwedî hişmendî bigihînin. Di nava hefteyekî de bi giştî 36 saet dersên Kurdî tên dayîn. Bi taybet jî dersên Kurdî rastî eleqeyeke mezin tên û ji ber vê yekê em kêfxweş in. Dewletê zimanê Kurdî qedexe kiribû û em dixwazin bi dersên Kurdî xwendevan zimanê xwe pêş bixin."
Xwendevanan diyar kirin ku Mala Piştgiriya Perwerdehiyê ji bo wan piştgiriyeke baş e.

MÛŞ