Şaxa KURDÎ DER'ê ku di Hezirana 2010'an de li navçeya Erdîşa Wanê hate vekirin, di demek pir kin de rastî eleqeyek gelek mezin hat. Komeleya KURDÎ-DER'ê ku 4 rêveberê wê girtî ne, bi qurs û dersên ku dide bala her kesî dikişîne ser xwe. Komele di atolyeyan de dersên wêje, matematik, dîrok û erdnîgariyê dide û xwendekaran di her qadê de perwerde dike. Şaxa KURDÎ-DER'ê ku heta niha li 190 xwendekaran re sertifika belav kir. Niha jî li komeleyê ji 80 şagirtan re dersên kurdî tên dayîn.

Serokê Şaxa KURDÎ DER'ê ya Erdîşê Cevdet Zilanli, anî ziman ku serlêdan pir zêde ye û di bersîvdayîna xwendekaran de zahmetiyê dijîn. Zîlanli, da zanîn ku her diçe eleqeya li hemberî Kurdî zêde dibe û hêjmara xwendekaran jî zêde dibe.

Di nava zextan de xebat
Zîlanli, anî ziman ku di 15'ê Gulana 2012'an de di bin navê operasyona KCK'ê de polîsan bi ser komeleya wan de girt û di serdegirtina komeleyê de polîsan hemû alav û amûrê wan desteser kirin. Zîlanli diyarkir ku polîsan di operasyonê de rêveberê wan Necmettin Açik, Omer Sayıner, Mahmut Çelebi, Abdurahman Çagan binçavkirin û piştre girtin.
Zîlanli destnîşankir ku ew di nava şert û mercên pir zahmed de xebatê dimeşînin û bi alîkariya gel hewl didin bibin bersîva xwendekaran.
Hîndekar û mamoste Mutalip Dag jî anî ziman ku ji 7 salî heta 70 salî her kes serî li wan dide û ji bo dersên kurdî eleqeyek mezin heye.
Şagirtê binavê Alparslan Butun (45) jî anî ziman ku Kurdî zimanekî dewlemend û zindî ye û piştî çand, wêje û zimanê Kurdî nas kir bêtir ji ziman hez kir û dewlemendiya wî bêtir dît. 

DÎHA/WAN