Di operasyona ku hêzên YPG’ê li herêma Til Hemis li dijî komên çete daye destpêkirin  û hîn didome de heta niha bajarokek û bi dehan gund hatin rizgarkirin. Li gorî agahiyên ku nûçegihanên ANHA’yê ji herêmên operasyonê bidest xistine, operasyona YPG’ê ji aliyê Til Koçer, bajarokên Til Berek û Til Maruf ve ji 3 aliyan hate destpêkirin. Di operasyona ku hîn bi awayekî berfireh didome de, bajaroka Til Berek hate rizgarkirin.


Devera girîng hat girtin
Ji qada di navbera Til Koçer û Til Hemis ku nêzî 65 kîlometre ye jî herêmek 60 kîlometreyî û bi dehan gundên li vê herêmê hatin rizgarkirin. Di operasyonê de her wiha riya Til Koçer û Til Hemis, riyên ku wekî “Riya Siyasî” û “Riya Petrolê” tê zanîn ket bin kontrola YPG’ê. Dîsa riya Til Hemis û Til Berek ket destê YPG’ê. Hate gotin ku bajaroka Til Hemis ku dikeve başûrê rojhilatê Qamişlo niha 6 kîlometre ji aliyê Til Berek, 7 kîlometre ji aliye Til Maruf û 5 kîlometre jî ji aliye Til Koçer ve hatiye dorpêçkirin.  Hate ragihandin ku gelek noqteyên komên çete jî hatine dorpêçkirin û operasyona li van deveran didome.

Gundên hatin rizgarkirin
Ebû Xezef, Xenamiyê û 2 gundên bi navê Bezûniyê, Xirbit El Hatim, Şermûxa Mezin û Şermûxa Biçûk, Helac, 4 gundên bi navê Mesluna ku di yekê de kurd, yekê ereb, yekê jî tirkmen hene, Ebû Tiwêna, Til Bixêr, Kulî, Xena, Sexlam El Xerab.

ANHA/TIRBESPIYÊ