Hen oseno, îhtiyacê hukumatê tirkî jû çuwalê bîn rê esto. Se ke eskerê Amerîka 4ê asma temuze yê serra 2003 Suleymaniye de sarê eskeranê tirkî kerd zerrê çuwalê, onca biyayîsode henen lazim o. Amerîka hem kî lewê peşmergan de sarê eskeranê kerdî bî zerrê çuwalan. 4ê temuze seweta Amerîka hen sire ra jû tarîx niyo. Amerîka na roze bi zonayîs çînît bî we. 4ê temuze seweta Amerîka roşana netevî û roza xoseriya Amerîka ya. Tabî rîwalê na roze ra manê na biyayîsî zaf girs o. O waxt hukumatê tirkî wastîsê Amerîka yê karardena ûsse Încîrlîk verva Saddam qebul nêkerd bî, ewro kî aynî çî keno. Amerîka ewro kî qebulnêkerdena dewleta tirkî yê karardena ûsse Încîrlîk onca jê vinetîsê verva xoseriya xo vînena, naye xo vîra nêkena.
La Amerîka Kobanê de zaf herey kewte hereket. Waxtoke YPG destcikerdîsê pêrodayîsan de dewê dormê Kobanê kerdî tol, însanî berdî cayê tîvarin, Amerîka gune o waxt vireniya DAÎŞ biguretenê, gune o waxt pirodenê. Amerîka vinete, vinete, keyke DAÎŞ kewt zerrê Kobanê, hona mudaxala kerde. Na semed ra pirodayîsê Amerîka yê verva DAÎŞ honde bi tesîr niyê. Rixmê naye rind ke Amerîka verva pêro rik û xoverdayîsê dewleta AKP, verva DAÎŞ kewte herb. Seweta Amerîka endî zelal o ke dewlet û hukumatê AKP poşt danê rêxistina îslamî ya terorîste DAÎŞ. Amerîka naye kî xo vîra nêkena.
Jûyena Avrupa kî her cirm erzena Amerîka ser. Sawoke jû quweta xo çîna. Siyasetvanê Jûyena Avrupa û azayê Jûyena Avrupa her çî Amerîka ra pînê, aktîf nêbenê. Sawoke yê azayanê Jûyena Avrupa esker û çekê xo çînê ke mudaxala bikerê. Jûyena Avrupa pîna ke Amerîka, Tirkiye de hureno, qesey bikero, îkna bikero. Jûyena Avrupa zaf diriyeniyade girse kena. Verva dewlet û hukumatê AKP vengê berz nêkena. Eskerakerdîsê ke hata nika Jûyena Avrupa ra ameyî, sayîya çalakiyanê kurdan û dostanê ci ra, ameyî dayene. Tabî xoverdayîsê çenek û xortanê kurdan yê Kobanê, fikrê hometa Avrupa kî vurna. Coka taye siyasetvanê Jûyena Avrupa derheqê Kobanê de gegane eskerakerdîsan danê, la pratîk de verva çetayanê DAÎŞ pêrodayîs de gamanê eskerî nêerzenê.
Xoverdayîsê domonanê Kobanê yê verva DAÎŞ pêro hometa dîna îkna kerde. Na rîwal ra fikrê homete yê derheqê kurdan vuriya. Tirkiye biwazo nêwazo, endî tewa jê verî nêbeno, çike şarê dîna verva rêxistina îslamî ya terorîste DAÎŞ pêrodayîsê domonanê Kobanê xo rê numune cenê. Domonê Kobanê şarê Jûyena Avrupa kî verva zulmê DAÎŞ pawenê. Jûyena Avrupa gune endî diriyenî mekero û wedardayena qedexê PKK bijero rojdemê xo.