Çend rojî verê wesayîtê bêmerdimî (SÎHA) yê artêşa tirkî bombe eştibî dewa Talê ya ke girêdayeyê bajarê Colemêrgî ya ser de û netîceyê eştişê bombeye de kesêk merdbî û 3 kesî zî birîndar bîybî. Dewlete verê cû nê kesan sey terorîst nîşan daybî, labelê dima ra Wezîrê Karê Zereyî Soyluyî dîyar kerdbî ke beno ke şaşî bîyo.

Heyetê Partîya Demokratîke ya Şaran (HDP) derheqê hedîseyî de raporêk amade kerd û rayapêroyî rê aşkere kerd. 

Heyetê HDPyî raporê xo de bale anto xeberê ke hetê medyaya hetgire ra ameyî parekerdiş û raştîye ser û wina vato: “Hedîse ra dima Wezîrîya Karê Zereyî aşkere kerdbî ke 4 endamê rêxistine ameyî kiştiş, labelê wexto ke çimeyê herême raştîye vatî, dima ra walîtîye qetilkerdişê sîvîlan keyepelê xo de aşkere kerde, labelê walîtîye zî nê sîvîlan sey hemkarê rêxistine nîşan daye.”


Wa Homa heqê ma nêverdo

Heyetî dewamê raporî de ca dayo vatişanê dayîka Mehmet Temelî Sîma Temele û dayîke wina vato: “Ez roja arefe keye de bîya, lajê mi Mehmet do biameyêne mi biberdêne pêvînayîşê mêrdeyê mi. Mehmet mi gêra, labelê mi va ‘hema rew o’. O zî va ‘ez Hênîyê Kanîreşî de nan wena, dima yena to bena’. Mi do nimaj bikerdêne, la mi vengê bombeyêkî eşnawit. Ez şîya ke dewijî ver bi hênîyî vazdanî. Dima ra birazayêkê mi, mi berd nêweşxane. Ez dima ra musaya ke netîceyê eştişê bombe de lajê mi birîndar bîyo û dima ra merdo. Wa Homa heqê ma nêverdo. Nê roşanî ma rê kerdî jehr. Wa nê zulmî ti kes qebul nêkero.” 


Yê ke gerre kerdo ameyo tehdîtkerdiş

Heyetî rapor de ca dayo tehdîtbîyayîşê merdimanê mexduran û wina vato: “Wexto ke birîndar yenî nêweşxane, dormeyê nêweşxaneyî hetê wesayîtê zirxin û polîsan ra yeno girewtiş. Polîsan tîya de seba ke merdimî kom nêbîy, gaz û guleyanê plastîkan xebetnayî. Netîceyê mudaxaleyê polîsan de 5 kesî birîndar bîyî. Kesê ke tîya de ameyî derbkerdiş, waştî ke rapor bigîrî û polîsan gerre bikerî. Labelê raştê tehdît û zextanê hêzê dewlete ameyî. Polîsan tîya de vato ‘kam ke gerre bikero, ma do înan hemkar îlan bikerî û tewqîf bikerî’.


Çîyê ke ameyî tespîtkerdiş

Peynîya raporî de wina ameyo vatiş: “Cayê hedîseyî cayo ke ameyo qedexekerdiş nîyo û cok ra îxtîmalê her tim sîvîlî herême de bibîy, esto. Dewijê ke sey gumanin ameyî îlankerdiş, kontrolan ra derbaz bîyî û ameyê nêweşxane; madem gumanin î, o wext senî kontrolan ra derbaz bîyî? Îmkanê tepiştişî estbî, o wext çira SÎHA ame xebetnayîş? Dozger seba tehqîqatî nêşîyo cayê hedîseyî. Ma do heme prosesanê huqûqî de hetê mexduran de bibîy. Seba roşnkerdişê hedîseyî çi destê ma ra bêro ma do bikerî.” 


 AMED