Kurdistan de key ke, yew-jew komkiştiş bibo, ayê-iye ke bi nameyê dewleta tirk qisey kenî, pêronê înan eslê xo de kurdê. Dayê û babîyê înan kurdê, la ayê-iye biyê dewşîrmeye tirk. Wexto ke şarê kurd seba azadî û îdareyê xo yew gam erzeno, reyna-onca merdime hina-niya vejîyenî meydan, bi nameyê dewleta tirk qisey kenî.
Komkiştişê Parîs de kamî hewe ewîl qisey kerd?Husên Çelîk ê AKP’yij. Herkes zano Husên Çelîk eslê xo de Sêrt ra yo. Dayê û bawê eyê kurdê. La o bîyo dewşîrmeyê tirk. Husên Çelîk’î o wextî aşkere kerd ke, komkiştişê Parîs, PKK mîyanê xo de kerdo. Dima ra se bi? Vejîya werte ke komkiştiş bi îtifaqê AKP-Cematê Fetul-Munafiq û MÎT’î viraziyayo.
Eynî çi komkiştişê Roboskî de zî bi. Vernîye herkesî de, kamî qisey kerd? Beşîr Atalay. Heta şi Roboskî de generalê xo virarde kerd. Dayê û babiyê Beşîr Atalay’î zî kurdê. Labelê o zî sey Husên Çelîk bîyo dewşîrmeyê tirk. Beşîr dima ra kamî qisey kerd? Galîp Ensarîoglu. Ensarîoglu dewşîrmeyekê senîno, şarê kurd rind şinasneno.
AKP hemverê-dustê şarê kurdî de şer-herbekê zaf giran dayo destpêkerdiş. Tim û tim kam danê qiseykerdiş? Galîp Ensarîoglu. Galîp Ensarîoglu seba-seweta ke şarê kurd bixapîno zûran zî keno. Vano, “Rayverê Şarê Kurdî ra yewbîdîyayîş-pêdiyayiş viraziyayo, Ocalan’î hina hina vato.
Dewşîrmeyê ke hemverê şarê kurdî qisey kenî, ebi nînan ra sînor niyê. Zewbînî zî estê. Nika zî Bekîr Bozdag vejîyayo meydan. Senî ke, KCD netîceyê kombîyayişê peynî de qerarê xo îdarekerdin aşkere kerd, verniyê herkesî Bekîr Bozdagî gal galê kerd. Û Vat ke, “çiyo ke Amed de bîyo xayintî yo, Selahaddîn Demîrtaş xayin o. Kes nêşkeno-besenîkeno şarê kurd û şarê tirk yewbînî-jûbînî ra cîya bikero.”
Dayê û babiyê Bozdag’î zî kurdê. Labelê o zî bîyo dewşîrmeyê tirk. Şarê kurd ra îxanek kerdo, biyo neyarê şarê xo. Ayê-iyê ke seba-qabê azadiyê kurd û kurdistan têkoşîn kenî, ayê-iyê na rê vano xayin. La xayino esil Bekîr Bozdag o. Bekîr Bozdag’î ra dima Ehmed Dawidoglu û RT Erdogan’î zî va, “O hemserok xayino. Hina-wina Selahaddîn Demîrtaş’î hedef damusnenê.
Wa neyarê şarê kurd hina-niya qisey bikerê. Eyê çi bikerê zî nêşkenê verniya têkoşîna şarê kurdî bigîrê. Hele dewşirmeyê sey-zê Husên Çelîk, Beşîr Atalay, Galîp Ensarîoglu û Bekîr Bozdag’î se bikerê, neşkenê têkoşîna şarê kurdî bixetiminê.
Îngilizî derheqê înan de yew qiseyêk zaf rind vatê. Îngilizî vanî, “Wexto ke yew kutikêk to yê rind bibo, hewce nêkeno ti qisey bikerî, herinde-hurendiya to de o laweno.” Dewşirmeyî wa seba wayîrê xo bilawê. La şarê kurd rayîra azadî girewt o. Şino ha şino. Şarê kurd, Amed, Cizîra Botan, Nisêbîn, Gever, Silopîya û Kerboran de hina keno.