Tarîx de kî şarê kurdî sey roja ma ya ewroyî mordemîye, şarî belayanê zaf girsan ra xelesnayê ra.
ŞEYDA ASMIN
Serokê amerîka trumpî eşkera kerd ke înan Surîye de DAÎŞ qedenayo edî maneyê mendîşê înan surîye de nêmendo!
Eceb! Çi Eceb!
Rastî surîye de kamî DAÎŞ qedena? Kamcîn hêzî ne va serd, ne va germ, ne va mendene û nêmendene verê xo da cinawuranê DAÎŞî, ê kerdî pak? O cinawuro ke dewletan nêşkîyay hemverê ey de xo ver ro bidêrê, kam şîkîya xo ver ro bidêro û o yo ke bîyo belayê serê mordemîye kerd pak? Her kam o/a ke peyê heqîqetî de bo, her kam o/a ke şenik bo kî wayîrê tayê erdeman bo o/a do vajo Kurdan! Vajo Şarê Kurdî.
Rojawa û vakurê surîye de şarê kurdî bi bedelanê zaf giran herra xo DAÎŞî ra kerde pak. Ey şarî domanê xo bedel dayî. Keyne û lacê xo yê sey aşmaçaresî dayî. Keyne û lacê xo yê ke çimanê xo ra seveknayênê dayî. Bi desan nê bi hezaran dayî. Nika kes, tu hêz nêşkîno nê bedelan bikero malê xo ya kî înkar bikero. Bê şik dewletî goreyê bingehê xo tim dizdîye kenê. Verê înan dizdiye kerda nika kî kenê û ê bikerê. Amênê înan de esto. Amênê înan ser dizdiye, ser înkarî yo. Ya muhîm o yo ke, şarî, hêzê teberê dewlete bi na propagandayê mexapîyê. Tim pey rastîye de pey heqîqetî de vindêrê…
Tarîx de kî şarê kurdî sey roja ma ya ewroyî mordemîye, şarî belayanê zaf girsan ra xelesnayê ra. Numuneyo tewr verê çiman Med ê. Medan împarotorê Asur o yo ke sereyê însanan ra kela viraştênê û bi nê pesna xo dayênê rijna û pêroyê şarî binê zulm û zordarîya ey ra xelesnayî ra. Ewro kî kurdan mordemîye binê zulm û zordarîya DAÎŞî ra xelesnaye ra. Şarî xelesnayî ra. Xelesnenê ra. Ez vana xelesnenê ra çunke DAÎŞ hîna nêqedîyo. DAÎŞ dewleta tirk a. DAÎŞ Erdoxan o. Û çîyo balkeş dewleta amerîka pîştî dana dewleta tirke. Pîştî dana Erdoxanê dîktatorî. Helwestê serokê Amerîka yo pêyên kî bi nê pîştîdayîşî ra girêdayîyo. Wazenê komployî newe bikerê. Gereke sere de şarê kurd û pêro şarê ke serê na herre de cuyenê ferqa na rastîye de bê û goreyê naye tewbigerê. Bi hêza xo ya cewherî bawer bê. Yewbîyena şaran binê banê netewa demokratîk de do bibo qedîyayîşê faşîzmî, bibo qedîyayîşê zulm û zordarîya serdestan.