Dişmenê ma AKP û dewleta tirkî bi wehşî hêrîşê Kurdistan kenî. Xora dişmenê ma sey Erdogan înan vanî “Ma Kurdistan’î de kuç ser kuç nêverdanê. Ma Kurdîstan xirab û vîran kenî. Ma veng û tal kenî. Çi destê dişmen û neyaran ra yeno anî ca, texsîr zî nêkenî.
Bi hêrîşê dişmenî de, Amed-Sûr, Cizîra Botan, Gever, Hezex, Nisêbîn û Şirnex de hema hema keyeyo ke nêrijîyo û xirab nêbe nêmendo. Şarê ma bêkeye û bêwerdişî mendo. Bêstarî mendo. Cayêk çîno bibo starîya şarê ma. Îxtiyacîya şarê ma çiqas şino zêde beno. Dikan, cayê kar û şuxul zî ameyê xirabkerdişî.Seba ke nê birînê (dirbet) şarê ma bêrê dermankerdiş, hetê Heyva Sor a Kurdistan bi nameyê “Kampanyaya Keyeyê Wa û Biraye” yew kampanya ameya destpa kerdiş. Qey (serva) na kampanya Stêrk TV û Med Nûçe TV de bernameyê teybet ameyê viraştiş. Eleqeyê şarê ma qey na kampanya zî her roj zêde beno.
Çîyo hina (wina) kulture Kurdistan’î de verê cû zî estbi. Yeno vîrê mi. Hema ez tutê (doman) biya. Dewanê ma de wexto ke yew feqîr bibenê, pêronê dewijan ameyê pêser, qey eyê feqîrî rê hetkarî kerdênê. Her yew keyeyê yew û di bize dayenê ayê feqîrî. Ma vajê dewê 30 keye bibenê, her yewî di bize bidenê eyê feqîrî, ayo feqir bênê wayîrê 60 bizan. Pê ayê bizan îdare xo kerdênê. Feqîrî ra zî xelas bênê.
Nika zî ver hêrîşê AKP û dewleta tirkî, şarê mayo ke belengaz û feqîr bîyo, îxtîyacîya eyê şarê ma hetkarî ra esta. Bi taybet şarê ma yo ke Ewropa de ciwîyeno eşkeno zêdayîr yardime şarê ma yê Amed-Sûr û Cizîra Botan bikero. Her keye ma yê Ewropa yew keyeyê wa û biraye bigero ser xo, her aşme 150 euro bişirawo, tayî zêde birîna înan derman keno.
Wexto ke hina bikero neyarî zî nêşkenê, şarê ma yo ke hewcedariya ci esta, nêkewno tore neyaran. Çunke neyarê ma AKP û dewleta tirkî hem bajarê ma xirab û vîran kenî, hem zî bin nameyê hetkarî de hewl danê şarê ma bioncerê tora xo. Dima ra zî heşê înan ra kaykenî. Têkoşîn ra dûr visnenî. Gera şarê ma ayê Ewropo na raştî bivîno û gore nayî wayîrê şarê ma bivejîyo. Gera şarê ma qey “Kampanyaya Keyeyê Wa û Biraye” eleqe xo şarê bîn ra zî virazo. Şarê ma hina bikero eşkeno şarê bîn sey Alman, Îngîlîz, Fransiz, Hollandî, Swedî, Amerîka’yî ayê bîn zî beşdar û tewre na kampanya bikero.
Yew Alman, Îngîlîz, Fransiz û Hollandayij ayê bîn zî eşkenê yew Keyeyê Bira û Waye yê Kurd xora virazenê û yardime înan bikerênê. Na kampanya serrekê hina dewam bikero do netîceyekê zaf gird bigero.