METÎN YOKSUN / MA / STENBOL
Konfederasyonê Sendîkaya Kedkaranê Rayapêroyî (KESK), Konfederasyonê Sendîkaya Kedkaranê Şorişgêran (DÎSK), Yewîya Odeyê Mîmar û Endezyarê Tirkî (TMMOB) û Yewîya Doktoranê Tirkî (TTB) piştî dayî yewbînan û startê kampanyaya ‘Ma OHAL nê demokrasî wazenê’ dayî destpêkerdiş. Çarçaweya na kampanya de do çalakîyî bêrî viraştiş û îdarekarê komeleyan reyde pêvînayîşî bêrî kerdiş.
Babete ser o Serekê Pêroyî yê DÎSKÎ Kanî Bekoyî qisey kerd û qiseykerdişê xo de qala kampanyaye kerd. Bekoyî destpêkê qiseykerdişê xo de dîyar kerd ke OHAL tewr zêde zirar dayo kedkaran û wina va: “Kesê ke demokrasî wazenê gerek reaksîyon nîşanê rewşa OHALî bidî. Seba demokrasî ma pêvînayîşan kenê û ma do demêko nizdî de plansazîya xo aşkera bikerê. Karê ma yo ewil kombîyayiş o. Ma do kombîyayişê OHALî bivirazê. Seba ke OHAL bikewo rojeva Meclîsî û biwedarîyo ma do HDP û CHPyî reyde pêvînayîşan bikerî. Ma do heme sazîyê ke sîyaseto demokratîk kenê reyde pêvînayişan bikerî.”
Seba demokrasî çalakîye
Bekoyî qiseykerdişê xo wina qedêna: “Welatê ma kaşî ver de yo. Bedêlê na kampanyaye se beno wa bibo ma do têkoşîn bidî. No proses de tewr zêde karker û kedkarî zirar dîyî. Kesê ke xo ra vanê ma merdim î, ganî vera OHALî de reaksîyon biawnî û têkoşîn bidî. Seba demokrasî ma do vilawek û afîşan keye bi keye vila bikerî. Seba çareserîye ganî çalakîyî zî bêrî kerdiş.”