Bi averşîyayîşê teknolojîyî xeylê çîyê kultur û ananeyî ver bi vînîbîyayîşî şonî. Nînan ra yew zî kaya dameyî ya. Herçiqas ke tarîxê dame û kişike nêro zanayene zî, ma zanî ke tarîxê her di kayan zî mîyanê kurdan de xeylê kehen o.
Nê her di kayî zî hetê 2 kesan ra yenî kay kerdene, labelê bitaybetî cematê meymanan û cayanê şimitişê çayî de bi aqlêko ortax yenî kay kerdene. Bajarê Amedî de vernîya Camîyê Girdî de xeylê kesî dormeyê kaya dameyî de yenî têhet û kaye temaşe kenî.
Bi no qeyde hem kaykerdişê dameyî dewam keno û hem zî kulturê pêro pîya dem derbaz kerdene zî yeno domnayene. Wextê dameyî de kesê ke dormeyê kaye de yenî pêser, kaykerdoxan rê fikrê xo vanî û bi no qeyde ewnîyayîşê kaykerdoxan zî hîra beno. Serkewtiş yan zî binkewtiş de ge-ge kaykerdoxî hêrs bibî zî, kaykerdoxî bi kêfweşîye kaye kenî. Reyna kaykerdox û temaşekarî wextê kaykerdişî de yewbînan ra qala meseleyanê verênan kenî û bi no hawa kulturê fekkî yê kurdan ser o zî tesîrêko bîyaye keno.
AMED / EMRAH KELEKÇÎER