Hemserekê Kongreya Komela Demokratîke Hatîp Dîcle, îzah kerd ke, semedo ke şaredarîyan ser o teda û zorî bîyê zêde waştê Şaredarîya Bajarê Gird a Amedî zîyaret bikerê. Dîcleyî, vist vîr ke şaredarî dezgeyê şarî yê, hetê şarî ra ameyê weçînayîş û va, No edet se serrîyo ke dewam keno. Semedo ke şarî rê xizmet bêro kerdiş, mîsyonê şaredarîyan muhîm o. Şaredarî, yan zî Rayberîya Herêmî bingehê demokrasî yê. Lazim o îradeyê şarî rê hurmet nîşan bidîyo. Wedartişê parlementerîyan, muhakemekerdiş û operasyonê tepiştişî siyasetê demokratîkî asteng kenê zerar danê demokrasî. Eke şaredarîyan rê kayyûmî bêrê tayînkerdiş demokrasî derbe gêna û no muamele nêno qebûlkerdiş.”
‘Demokrasîya Herêmî esas a’
Hemşaredara Şaredarîya Bajarê Girdî Gultan Kişanake zî zîyaretîya heyetê KCD ver keyfweşîya xo îzah kerd û wina va “Seserra 21ine de demokrasî bi Rayberîya Herêmî aver şona. Hînî tu kes merkez ra îdarekerdiş nêwazeno û hînî demokrasî bi Rayberîya Herêmî yena namekerdiş. Bingehê demokrasî no yo ke, şarî de têkîlîronayîş, şar bieşko bi rehetî kesê ke weçînayîbî bisehno. Eke Rayberîya Herêmî bêra tasfîyekerdiş demokrasî leqena û şawenîyena.”
‘Tena demê derbeyî de
kêberê şaredarîyan yeno padayîş’
Kişanake dewamê qiseykerdişê xo de îzah kerd ke, eke wina yew çî bêro kerdiş, demokrasî debeyêka giran gêna û wina va “Eke wina yew çî bêro kerdiş, demokrasî debeyêka giran gêna. Gelo kesê ke wina kenê hesabê nê çîyan kenê yan ney? Rayberîyê Herêmî cayê xizmetkerdişî yê. Rayberîyê Herêmî semedo ke şarî rê xizmet bikerê estê. Demokrasîyanê en kehenan de zî estbîyayîşê Rayberîya herêmî rê tehemul esto.”
Kişanake îzah kerd ke, wezîfeyo ke nika kenê hetê şarî ra ameyo dayene wina va: “Encex şar eşkeno ma wezîfe ra bigîro. Tena demê derbeyî de berê şaredarîyan yeno padayîş û karmendî yenê tayînkerdiş. Heta nika demokrasî zaf debe girewta. Ez hêvî kena ke winasî yew çî nêbeno.”
AMED