Grevê vêşanî yê Kemal Guno ke seba cenazeya lajê xo Murat Gunî bigîro, roja 83în de yo. Heyetekê KCD û HDP vizêr şî zîyaretê Gunî.
Hemseroka Kongreyê Civaka Demokratîk (KCD) Leyla Guven û Parlamenterê Partiya Demokratîk ê Şaran yê Dersimî Alîcan Onlu şî zîyaretê Kemal Gun o ke 83 rojîyo Meydanê Seyîd Riza de grevê vêşanî de yo. Leyla Guven vist vîrî ke apê Kemal çi heyf ke seba esteyanê lajê xo bigîro kewto grevê vêşanî. Guven va, ‘Tîya Tirkîye ya û her çî beno.
‘Şermê Tirkîye yo’
Guven ard ziwan ke, ê pey gencê ke seba cuwîyayîşa birûmet weşîya xo kerdî vinî yê û wina va: “Ma pey domananê xo yê. Ma dê têkoşîna înan biramnê. La ma nêşkenê esteyanê înan bigîrê. No şermê Tirkîye yo.” Hemseroka KCD Leyla Guven vist vîrî ke, ê dê seba Tirkîyeyêka demokratîk û Kurdistanêka azad, têkoşîna xo biramnê. Guven aşkere kerd ke bêvengîya hemverê pîyekê ko esteyanê lajê xo wazeno, nê ke cewabê înan çin o, hemverê xoverdayîşê pîyî bêçareyîya înan damûsneno.”
Parlamenterê Dersim Alîcan Onlu zî vist vîrî ke, ênan esteyê mordemanê xo yê ke Tertelê 38’î de weşîya xo kerdî vinî zî nêgirotî. Onlu da zonayen ke wijdanê înan winî wişk bîyo ke, ê nêşkenê bi hawayê aşkere bikewê dewre. Onlu waşt ke Gun grevê vêşanî biqedîno.
Kemal Gun oke 83 rojîyo girev de yo zî berxudarîya xo seba zîyaretî ard ziwan û waştena qedînayîşê grevê vêşanî qebûl nêkerd. Gunî va, heta ke esteyanê lajê xo bigîro, bedelê ci weşîya ci bo zî do têkoşîna xo ra fek vera nêdo.
DÎHABER/DERSIM