Hevserokînê Konseyê Rayverîn ê KCK’î derheqê êrişanê Amed’î de eşkerekerdişê da. KCK’î êrişan ra AKP û dewleta tirk mesûl girot û kurdistanij û raya pêroyin ê Tirkiye ra jî wast bi hesas û aya hereket bikiro.

Hevserokînê Konseyê Rayverîn ê KCK’î êrişê Amed de viraziyay ser damûsnayinê û da û êrişan ra AKP û dewleta tirk mesûl girot. KCK’î eleqe ant wext û cayê êriş viraziyayo ser û vat: “Jew cayo ki 7’ê hezîran de serkewtinê gird vist dest jî Amed o. Bi enê êrişa waziyeno encamê siyasî ê serkewetinê tarîxî werte ra hewadiyo.”


‘Enê êrişî binê kontrolê JÎTEM de viraziyenê’

KCK’î ard ziwan ki, çi wext Hereketê Azadiyê Kurd şino ravey, dewleta tirk plananê lîmin fînena dewre û enê êrişê Amed de viraziyayê jî, leteyê siyasetê lîminê dewleta tirk ê vera şarê kurd ê welatperwer o.

KCK’î êrişê Amed de viraziyay, zey êrişê binê kontrolê JÎTEM de hesibinay û wina dewam kerd: “Enê êrişî binê kontrolê JÎTEM de viraziyenê. Iyê ki verê weçînayinan her firsedî de êrişê welatperweran kerd, badê weçînayinî jî êrişan ramenê. Vatenê vatoxê HUDA-PAR Huseyîn Yilmaz ê zey, “waziyeno kaos vejiyo; quwetê polîs wezîfeya xo nêkenê” dûrê rastînê. Eynî wext de demogojiyê qandê meşrû mûsnayinê êrişano. Ê çoşmeyê êrişana eleqeyê ci esto, bi ê vatenana wazenê êrişanê xo meşrû bimûsnê.”


‘Êrişa Amed de, îlanê lej ê hukumetê AKP ê vera şarê kurd o’

KCK’î êrişî zey planê AKP bi name kerdî û wina vat: “Iyê ki bi nameyê Hîzbullah êrişê şarî kenê, JÎTEM ê. Çeteyê rêxistinkerdey ê quwetanê xorî yê. Hereketê Azadiyê kurd, bi mengano vera êrişan bi hesas hereket kerdo û nêameyo kayanê AKP. Eno hesasiyetê hereketê ma, ameyo îstîsmar beno û waziyeno çimê şarî bitarsayniyo. Bê nay, îzahetê bîn ê êrişan çiniyo. Hukumetê AKP verî weçînayinan wast aloziyan vejo û rayanê xo vêşî bikiro û îktîdarê xo biramo. Badê weçînayinî jî êriş û provokasyonan dewam kerdî û kaos vet. Wazena vajo, “cayo ki ez çinêbî, çiyê winayinê bibê”. Wazena fina bi serê xo bibo hukumet. Qandê fina bîn, bibo hukumet rayê lîminî vistê dewre. Êrişa Amed de, îlanê lej ê hukumetê AKP ê vera şarê kurd o.”


 Bi hesas û aya hereket bikirê

KCK dazanayin ki dewleta bi xo êrişanê kontra teşfîq kena û wina dewam kerd: “Wextê protestoyanê 6-9’ê cotmeh ê qandê Kobanê de, vêşiyê 40 welatperwerî hetê kontra, polîs û faşîstana kişiyay. Vera enê rastiyan, çend qeçek û gencî bi îdîayê kiştena 2-3 HUDA-PARijan girotiyay. La belê qe jew êrişkar û kiştoxê welatperweran nêgirotiyay. Quwtê kontrayê ki xo ra vanê “Hîzbullah” cesaret vînenê êrişê şarî bikirê. Înan pey de quwetê xorî estê. Gerek enê êrişî, zey êrişê quwetanê xorî ê bi maskeyê ‘Hîzbullah” bivîniyê.”

KCK’î kesê peyniyê êrişan de weşînê xo kerdo vinî, zey şehîdê azadî û demokrasî bi name kerdî, bi hurmet ardî vîrî û keyanê înan û şarê kurd rê serweşînin wast.KCK’î damûsnayinê xo bi enê vengdayişiya qedînayo: “Gerek herekes, bi taybetî quwetê demokrasî vera enê êrişanê plankerdey ê vera şarê kurd bi hesas û aya hereket bikirê. Qandê girotinê verniyê enê êrişan, lazimo îtîfaqê demokratîk beriya ravey û firsed mediyo hewesê ronayinê rejîmê otorîter û zoradar ê Tirkiye û Kurdistanî de.


 ANF/BEHDÎNAN 



Demîrtaş: AKP Tirkiye kiweno kaosî miyan


Hevserokê HDP Selahattîn Demîrtaş jî provokasyonê peyin ê Amed’î ra AKP mesûl girot û vat, AKP Tirkiye kûwena kaosî miyan. Demîrtaş, biyayişna ra mesûl girotinê HDP jî, zey alçaxîn û bêsewîtîn hesibinê û vat: “Iyê ki kişiyenê û qurbanî maymi û bado vejiyenê ma sûcdar kenê.”

Hevserokê HDP Selahattîn Demîrtaş provokasyonê derheqê provokasyonanê peyinî de qisey kerd û vat ki, provokasyonê Amed’î pey de hukumetê AKP esto. Demîrtaş vist vîrî ki, peyniyê êrişan de 3 HDP’ijî kişiyayê û xeylê biyê dirbetinî û vat: “Jew embazê ma, keyeyê xo ê qatê 5in de kişiya. Kamo nînan keno? Gerek êrişê bombeyin ê 5’ê hezîran, heme hetan ra roşnî bikirê. Keso ki tepişiyayo kamo? Kotî ra û senî ameyo? Kamî ra desteg giroto?”


‘Medya AKP alçaxîn kena’

Demîrtaş’î nêrazîbiyayişê tûj mûsina medyaya AKP û wina vat: “Kamî Serokê Komeleyê nezdiyê HUDA-PAR kişt? Kamî kişto wa vejê werte. Kamî Amed de 3 HDPijî kiştê? Medya AKP, manşet ra ma sûcdar kena. Medya AKP alçaxîn kena. Iyê ki kişiyayê û qurbanî maymi û bado werzenê ma sûcdar kenê. Destê ma de tifîngî çiniyê. Ma zanê tifîngê destê kamî de. Ma siyasetê demokratîk esas genê. Lazimo herkes û her çoşme bi aya û hesas hereket bikiro.”

Demîrtaş‘î vist vîrî ki Serokkomarê tirk Tayîp Erdogan û serokwezîr Ahmet Davutoglu vera provokasyonî bêveng mendê û vat: “Serokkomar, serokwezîr, wezîrê edelet û karanê zerî werte de niyê. Iyê wazenê lejê zerî vejiyo. Bado werzê vajê ‘Qîmetê AKP bizanê, wexto ki AKP çinêbo, wina beno.” 

Demîrtaş’î eleqe ant êrişanê vera HDP ê verî weçînayinî jî ser û vat: “Ê êrişê vera partiya ma, jew cara amey plankerdiş. Her firsedî de HDP hedef mûsnayê. Ma nêkewtê lejî, ma kewtê weçînayinî. Ê çiqas êriş kenê wa bikirê, mayê xo bipawê. Ma kafirê qurbanîn niyê. Jû partiya siyasî ê demokratîk ê. Mayê rengdayinê Tirkiye de rol bigirê. Ma xo deyndarê şaranê Tirkiye vînenê. Mayê meviradê Tirkiye bikewo kaosî miyan. Eki ma çinêbiyayê, Tirkiye nêşayê nefes bigiro.”


 DÎHA