KCK vist vîrî ke jû aşma Remezanî ya bîn fina bin mesele û zehmetîyanê gird de yena pêşwazey kerden. Damûstayîn de kesê ke pey îxtidar, mal û mulkî de yê zey mesûlê nê meseleyan amey damojnayen. Komîteyî aşkere kerd ke dewletê zey Tirkîye yê ke xo rê vanê îslam raştîyê ke îşaretê estbîyayişê homa (haq) kenê înkar kenê.
Şarê ma bin tehdîtê qetlîam de yo
Komîteyê Şaran û Bawerîyan yê KCK vist vîrî zey xêlê şaranê misilman, şarê Kurdistan zî roceyê Remezanê 2016î bin êriş û tehdîtê qetlîaman de ravêrnena û damûstayîna xo wina domna: “Şarê kurd çar leteyê Kurdistan de hedefê operasyonanê quwetê ke beyraqtarîya dînê îslamîyetî kenê de yê. Vakûrê Kurdistan de zî kurdî bin sereştişanê Erdoganî û hikûmeta ci de yê. Wextanê peynî de hikûmeta Erdoganî hona jêde kurdanê dîndarî hedef gêna. Nê êrişanê xo bin maskeyê îslamîyetî de nimnenê. Hewl danê ke misilmananê Tirkîye yê wayrê wijdanî yê zî bikerê pîyakarê sûcanê xo. Serva misilmananê Tirkîye vengdayişê ma no yo ke mebê wertexê gunayanê hikûmeta Erdoganî û zey mumînan dûştê ci de bivejyê.”
Komîteyî vist vîrî ke dewleta tirk aşma Remezana ravêrdî ra na het Cizîr, Sûr, Nisêbîn, Şirnex û Gever de sûk û sûkekê kurdan rijna û veşna û wina va: “Zey çeteyanê DAIŞ bi sloganê ‘Allah û Ekber bi desan kurdan qetil kerdî. Raya texrîbat û mexdûrîyetanê girdî akerd. Gerek misilmanê Kurdistanî û Tirkîyeyî na aşma Remezan de dirbetinanê şarê ma bipeçnê û destê poştdayenî derg bikerê.” KCK waşt ke roceyê Remezan misilmananê Kurdistan û Anatolya rê bibo wesîleyê jûbiyî, wa û birabiyî, edalet, têdûştî û rindî.
ANF/BEHDÎNAN