Di daxuyaniya komîteyê de hat gotin ku heca Laleşê, îfadeya yekitiya gelê Êzîdî ya li her parçeyên cîhanê belav bûye û wiha hat gotin: “Bi wesîleya Cejna Laleşê gelê Êzîdî bi birayên xwe yên di nava hewcedariyê de ketine nava piştevaniyê û gele pirsgirêkên civakî jî di van rojan de li vî warî çareser dikin. Cejna Laleş û Heca Laleş di heman de îbadet û cejneke ku ji bo jiyaneke azad a gelan e. Heca Cemaya Laleş, ligel aştî, biratî û yekitiya gelê Êzîdî, îfadeya biratiya bi gelan re ye jî. Em Cejna Laleşê di serî de li gelê Êzîdî û hemû gelê Kurdistanê pîroz dikin. Cejna Laleşê di van rojên ku li Rojava û başûrê Kurdistanê êrîş pêk tên de, tê pêşwazîkirin. Ev geşedan li bo gelê me peyameke bi hêz a aştî û biratiyê ferz dike.”

Di berdewamiya daxuyaniya Komîteyê de hat gotin ku bi van êrîşan baweriyên cuda yên gelê Kurd tên hedefgirtin û wiha hat gotin: “Li Sûriye, Rojava, û Başûr her roj, komên ku ji xwe re ol kirine rûpuş, bi awayekî hovane êrîşê gel dikin. Tirkiye piştgiriyê dide van êrîşên hovane yên li ser gelê Kurd û heta di nava organîzasyonê de jî cih digire. Ji ber ku aktorên herêmî û global jî bedel çi dibe bila bibe, modela Neteweya Demokratîk hedef digirin. Ev hêz ji bo bigihîjin armancên xwe, di bi navê îslamiyetê de êrîşê gelê me yê Êzîdî, elewî û xiristiyan dikin. Bi vî awayî jî hawira jiyanek bi hev re, tune dikin. Polîtîkayên di asta îstîsmara ola Îslamê de tên meşandin, gelê ji baweriyên cuda yên Êzîdî, elewî, xirîstiyan, kakaî, yarsan û zerduşt di bin tehdîdê de dihêlin.” KCK’ê banga piştevaniya berxwedana Rojava û  bihêzkirina yekitiyê li Kurdan kir.

ANF/BEHDÎNAN