Bi nezdîbîyayîşê 4ê Nîsane, rojbîyayîşa Rayverê Şarê Kurd Abdullah Ocalanî ra pîya, çimî açaryay ser şert û mercê Ocalanî. Kurdistanijê ke Stenbol de ciwîyenê ardî ser ziwan ke Ocalan nameyê hişyarbîyayîşê Kurdan o û vistî vîrî ke, heta ke Ocalan Îmrali de bo, do haştî nîro.
Cinîya bi nameyê Ceylan Ozer dîyar kerd ke demo ke kurdî bi temamî çinî amey hesibnayîş, Ocalan bi nameyê hîşyarbîyayîşê kurdan û waştena serbestîya Rayberê xo kerd.
Welatijan ra Meltem Saglam zî da zonayen ke Ocalan Rayverekê şarî yo û aşkere kerd ke, heta ke o azad nêbo, kesek azad nêbeno. Saglam dîyar kerd ke Ocalan yew şarî temsîl keno û wina va: “Ma wazenê ke desinde Rayverê ma azad bibo. Ganî ti însan bin mercanê giran yê tecrîdî de nêmanê. Malbatê xo nêvîneno. No çîyekê dûştê heqanê mordemî yo. Ganî ca de peynîya nê şert û mercanê tecrîdî bîyarîyo.
‘Bê Ocalanî haştî nîna’
Cinîyan ra Hamdîye Aksoy zî hayr ant hewcedarîya haştî ser û wina qisey kerd: “Ma serbestîya Rayverê xo wazenê. Ma nêwazenê ne gerîla, ne zî lejkerî bimirê. Hinî ma haştî wazenê. Kezeba ma dayîkan besê xo veşîya. Wa hinî gonî nêrijîyo. Çareserîya meseleya kurd, destê Ocalanî de ya, heta ke Ocalan azad nêbo, ma zî azad nêbenê.” Aksoy peynî de aşkere kerd ke bê Ocalanî, haştî mimkûn nîya.
Welatijo bi nameyê Tacdin Kiliç’î zî waşt ke wextekê kilm de Ocalan mîyanê înan de bo. Kiliç’î da zonayen ke, hinî her wextî ra vêşêr serbestîya şarê kurd nezdî bîya û wina va: “Ma dê Rayverê xo azad bikerê. Wa şarê ma emel bikero ke Newroza serra ameyî de, Rayverê ma do ser sehneyê Newrozî ra xîtabê ma bikero. Nika ma her wextî ra vêşêr bi quwet ê.”
‘Xelesnayîşê şaran destê ey de yo’
Aysel Koca zî bi vatenanê ‘Hendayî serrî yo Ocalan bi tenya serê xo yew hucreyekê de yeno tepiştiş’ vera tecrîdî nêrazîbîyayîşê xo damûsna. Koca va no yew dûştê heqanê mordemî yo û va, “Eke Rayverê ma bivejyo do haştî bîro, do ganî nêrijyo. Iyê dê bivînê ke însanî senî bi hawayê demokratîkî ciwîyenê.
Vahît Dalgiçî zî diyar kerd ke serbestîya şarê kurd, girêdayê serbestîya Ocalanî ya û va, ‘Ganî o ma rê Rayverîye bikero, xelesnayîşê şaran destê eyî de yo.’
Raîfe Taşkindemîr zî vist vîrî ke Ocalan tenya seba kurdan nê, êşkeno seba pêrokîn dinyaye haştî bîyaro û va, ‘ma dê bîat nêkerê.
O hetê ruhî û zihnî azad o
Welatijan ra yew zî Muhammed Akman o ke vera tecrîdê ser Ocalanî rê nêrazîbîyayîş damûsna yo. Akmanî zî vist vîrî ke, ‘eke Ocalan azad bibo, do haştî, birabîyen û têdûştî bîro û wina dewam kerd: “Ganî dost û dişmenî baş bizanê ke, bi tepiştişan nêşkenê ma bitersînê. Ganî bi aqlîselîm fikir bikerê û hinî wezîfeyê xo bîyarê ca. Ganî haştîya mavêna şaran virazê.
Serhat Baysalî zî hayr ant serbestîya fîzîkî yê Ocalanî ser û va, “Xo ra Rayverê ma hetê ruhî û zihnî azad o, la seba ca ardişê serbestîya eyî ya kişta fizîkî zî bar giranî kewno gencan ser. Baysalî veng da gencan ke seba serbestîya Ocalanî têkoşîn bikerê.
DÎHABER/STENBOL