Her ke şono Tirkîya de krîzê ekonomî hîra beno û tesîrê xo esnafan ser de keno. Esnafî çinbîyayîş ver şonê û krîzê ekonomî ver gerreyê xo kenî.Esnafê Kemeraltî vayebîyayîşê dovîz û polîtîkayê teberî ser o qisey kerdî.
Esnafê Kemeraltî ra Ahmet Ergolîyo ke sewlan roşeno, qiseykerdişê xo de va ‘badê teşebbusê derbe, polîtîkayê AKPyî ver Tirkîya her tewir krîz reyde rî bi rî mendo’ û wina domna: “Goreyê serra verên karê ma nîme nîme kewto. Hukmat bi mehneya FETOyî bi seyan merdim kar ra dûrî vist. Wexto ke wina bibo, şar zî nêeşkeno pere xerc bikero. Zêdebîyayîşê dolarî zî tesîrê xo ma ser de zaf kerdo.”
Karê ma girêdayeyê dolarî yo
Esnafanê Kemeraltî ra Tûrgay Ogûzo ke çîtarekarî keno zî dîyar kerd ke badê vayebîyayîşê dolarî karê înan qet nêmendo û wina va: “Vayebîyayîşê çîyê çîtarî girêdayeyê dolarî yo. Wexto ke dolar zêde beno çîyê ke ma herînenî zî zêde benî. Seba ke dolar vaye ya, şar nêeşkeno çî biherîno. Goreyê serra verên karê ma 100 ra 60 kêmî bîyo. Seba esnafan dewlete çîyêk zî nêkena. Lazimîya esnafî bi kredî esta la dewlete problemê esnafan çareser nêkena.”
Rewşa karker û citkaran orte de ya
Mûzaffer Dalo ke Sûka Kemeraltî de kincan roşeno qisey kerd û wina va: “Rewşa citkar û karmendan orte de ya. Merdiman de pere çin o. Rewşa ekonomî tewr zaf tesîrê xo ma ser de kena. Her roje bombe teqîyenî û merdimî mirenî. Merdimî nêewtanenî şêrî teber. Ganî her çîyî ra ver, mergê merdiman rê çareserîye bêro vînayîş û bi hawayêko leze aştî û demokrasî bêro awankerdiş.”
Cîroya tewr xirab yê 10 serran
Mesût Sabrî Keleşî zî qiseykerdişê xo de wina va: “Esnafî cîroya tewr xirab yê 10 serran ciwîyenî û tarîxê tewr xirabî ra vîyarenî. Vayebîyayîşê dolarî, heme sektoran berd 10 serr verê cû. Ez û zaf esnafê ke ez înan şinasnena, ma pêro îflas ver de yî. Tirkîya çareserî îxracat de vînena. La ma bi polîtîkayê teber reyde nêeşkenî ser bikewî. Kesê ke welatî îdare kenî, ganî fek şerê zere û teberê welatî ra verabidî. Muşterîyê mi yê Ewropa mi gêyra û mi ra va ‘welatê şima de şer esto û her roje teqîyayîş virazîyeno. Seba aye zî ez emserr to ra mal nêgêna’ dima ra qet mi ra mal nêgirewt.”
DÎHABER / ÎZMÎR