IBRAHÎM ÊZIDÎ/ROJNEWS / ŞENGAL
3 serran ra dima êzidîyê ke koçberîye de yî, vera-vera agêrenî ca û warê xo. Labelê yê ke agêrenî ca û warê xo, seba ke cuyêka newe awan bikerî, lazimîya înan bi hetkarîye esta. Goreyê daneyê Keyeyê Şarî yê Şengalî heta nika 2 hezar û 6 keyeyî agêrayî Şengal.
Babete ser o Endamê Keyeyê Şarî yê Şengalî Hadî Mehlo qisey kerd.
Mehloyî va ‘heta ke destê ma ra bêro ma hetkarîye danî keyeyê ke agêrenî Şengal. Labelê lazimîya şarê ma hîna zaf bi hetkarîye esta’ û wina dewam kerd: “Bitaybetî lazimî pakkerdişê merkezê bajarî esta; çimkî hîna zî binê enkazê tayê awanîyan de cenazeyê çeteyan estî. No zî beno sebeb ke şarê ma bitaybetî zî domanî nêweş bikewî.”
Mehloyî dewamê qiseykerdişê xo de va ‘Xora tîya de kêmanîya doktoran esta’ û wina domna: “Seba ke mabênê pêşmerge û Heşdî El Şebî de nakokîyî estî, şarê ma nêşeno biagêro keyeyê xo. Ez veng dana kesê ke wayîrê wijdanî yî, wa vera xo bidî Şengal û seba newe ra awankerdişê Şengalî hetkarîye bidî. Çimkî şarê ma 3 serrî yo ke qasê xo zehmetîyî antî û 3 serrî yo ke binê çadiran de cuyenî.”