Seba wedarnayîşê tecrîdê ser Rayberê Şarê Kurdî Abdullah Ocalanî, grêvê vêşanîyo ke hetê Hemsereka KCDyî û Parlamentera HDPyî Leyla Guvene dabî destpêkerdene roja 173. de dewam kena. Çalakîya 7 hezar hepsîyan zî bêmabên dewam kena û çalakwanî biqerar î ke ê do heta peynî çalakîya xo bidomnî.
Kesê ke zîndanan de kewtî grev ra yew zî Lokman Aslan o ke Zîndanê Xarpêtî de maneno yo. Aslan Zîndanê Agirî ra surgunê Zîndanê Xarpêtî bîyo. Keyeyê Aslanî derheqê Aslanî de zanayîş da û veng da hukmatî.
Dayîka Aslanî Hizar Aslane va ‘Ma banderê çinêbîyayîşê ci bî, labelê ma banderê dejantişê ci nêbenî’ û wina dewam kerde: “Ma zanayêne ke Lokman esto û zîndan de cuyeno. Labelê nika grevê vêşanîye ver ma etirîyenî. Ma nêşênî şêrî pêvînayîşê înan. Vengê ci zaf xirab ameyêne. Ey mi ra va ‘peynîye de merg zî bibo, ma do dewam bikerî, şima zî vengê ma bidî eşnawitene’. Ma her serê sibayî bi ters şîyar benî. Ne şewa ma esta, ne zî roja ma. Ma wazenî wa gamî bierzîyî.”
Ma do destek bidî na çalakîye
Waya Aslanî Kubra Aslane zî bale ante bêvengîya selahîyetdaran ser û wina va: “Welat de her tewir çalakîyî yenî astengkerdene û yê ke wazenî qisey bikerî, yenî bêvengkerdene. Ma do heta peynî na çalakîye bidomnî û destek bidî na çalakîye. Ma do bêveng nêbî û vengê xo bidî eşnawitene.”
JINNEWS / WAN