Tirkîya û Kurdistanî de heme rojdemê ravêreyeyî xoserîya demokratîkî ra kilît bîya. Esil çareserî pêvînayîşî rayîrê xoserîya demokratîkî ra vêreno. No warî de destpêya ravêreyeya xoserîye yew hetî ra erey menda. No ereymendişê ravêreyeya xoserîya demokratîkî zî yew kinar ra zî kêmanîya verêne zî bêrayviststinîya taxê meclîsan ra vêrena. No warî de esil bingeya xoserîye û dest û linga rayvistinî meclîsê şaran o. La çi heyfo ke heyana ewro nê meclîsê şaran xo rayvistinî nêkerdo.
Rewşa pratîk de rolê xo kay kenê
Raya rêbazê meclîsan zî hewayê sîyasî partîyan ra xo rayvistinî kerdo û nê şaşey zî no hewa heyana ewro dewam kerdo. Ewro zî muhîmeya rayvistinîya meclîsê şaran vejîyeya raşte. Enkay ra pey zî meclîsê şaran rol û mîsyonê xo awankerdişê ravêreyeya xoserîye de û rewşa pratîkî de rolê xo kay kenê. Destpêya înşaya xoserîya demokratîkî raya rêbazê çalakîya rayvistinî çalakîya bêîtatîya demokratîk a sivîlî ya.
La çi heyf ke ewro hem Tirkîya û hem zî Kurdistanî de çalakîya bêîtatîya sivîlî pergal veranêdano ke bêro şuxilnayîş û hemverê nê çalakîyan ra heme tewr şîdet gurêneno. No warî de şar zî hînê bi rewşa mecbûrî ra xo paweno û no xopawitiş zî ra ray rewşa çalakîya demokratîkî beno û ra ray zî rewşa çalakîya şîdetî rey beno.
Heme raybazê qirêjî û qirkerdişî gurênena
No warî de esil mijarê babete çareserîya ravêreyeye ya û pêameyêşî ya. No hetî de heyanî ewro şûreqaya qesrê Erdoganî waşt ke qurnazîya luya fiskerî bikero. La çi heyf ke nêy planê qirêjî ya şûreqaya AKPe nêtepişt û nêtepîşena zî. Şureqaya AKPe û Erdoganî verê weçînayîşê 7’ê hezîrane de biryarê şero taybetî girewt û kerd dewre. Enka zî nê şerê taybetî ra heme raybazê qirêjî û qirkerdişî gurênena. Qabê weçînayîşê 7’ê hezîrane ra şarî heme tewr ra dersê şûreqaya AKPe da. Labelê hema zî nê şûreqaya AKP û Erdoganî nê planê şerî de israr kena.
Xoverdayîşê destanî Kurdistan de dewam keno
Yew hetî ra zî AKP û Erdogan esîrê yew kompleksê rêşa sîyaye bîyê û nê rêşa sîyaye her roj tikîna AKPe wena û qedênena. No warî de rewşa kurdan de zî yew awantajo gird vejîya yo. Hemverê nê kaos û têmankewtişî qirkerdişê AKP û Erdoganî ra vindertiş û dermanê çareserî rayverîya înşaya xoserîya şaran a. Nê fitîlê adirî ya şorişî Gimgim de, Colemêrg de, Cizîr de û Farqîn de.
Zerrîya şorişê ravêreyeye ya xoserî Cizîr de fîneno. Cizîr hemverê dagirkerîya tanq û topan ra, vêşaneyî û têşaneyî ya abluqa ra xoverdayîşê destanî nuştî. Û nê xoverdayîşê destanî hemverê dost û dişmenan dewam kena. Enka zî nê xoverdayîşê destanî Farqîn de, Sûrê Amedî de dewam kena. Enka zî bi rewşa xozaye ra yew firset kewto destê kurdan, ganî kurdî zî nêyî weş bigurênî.
Esil topê nê xoverdayîşî ravêreyîya xoserîye destê amedijan da. Amed ganî nê rolê xo yê dîrokî kay bikero. Na zî sewbîna tewr nê adir ma hemînan veşneno. Heyanî adir ma nêveşno, ma ko adirî biveşnê û kileya adirî berz bikerê.
Encax no tewr ma rayîrê şehîdanê xo ra şîyenê. Encax no tewr xoverdayîş rihê Mazlum, Xeyrî, Kemal û Saryayan şad beno. Roj rojê wayîrvejîyayîşê ravêreyeye ya xoserî ya.
Yew kes zî nêşkeno ke ewsarê Erdoganî bitepişo
Eke no hewa şîyayîş dewam bikero se Tirkîya yew rewşa tehlukeya girdî pawena. Dîrokê Tirkîya de heyana nika no hewa yew tehluke nêbîyo û nêvejîya yo. Erdogan aqilê ey celq bîyo û har bîyo. Hemverê nê harbîyîşê Erdoganî ra AKP mîyanî de yew namûsin û bi aqil merdim nêmendo. Erdogan sereyê xo giroto ragêreno û yew kes zî nêşkeno ke ewsarê Erdoganî bitepişo.