Ewro roşane ziwanê Kurdî yo-Zazakî,Kurmancî, Soranî, Hewramî, Kelhurî,Lorî-
La zerrê mi de zaf kul û derd esto. Hetê ziwan de xeletî û sextekarî zafa.
Rojê ziwanê dayî yeno,herkes qise keno, meş keno. Roşanê ziwanê Kurdî yeno, herkes qise keno, meş keno.
La wexto ke dor yena Kurdî, bi teybet Kirdkî-Zazakî-, qisekerdişe, sextekarî bena.
La wexto ke dor yena Zazakî qisekerdiş, Zazakî averberdiş, nê karan ra yew çîno.
Halê Kurdê Zaza naye hetê welatparêzîya ziwan de zaf xiraba.
Her ser eynî dîk û eynî çî.
Welatparêzîya hina seyî bena?
Welatparêzî tenê rojê ziwanê dayî û roşane ziwanê Kurdî de xo bi vejî meydan û yew beyanet bidî, hina nîya.
Qijan-domanê- xo ra Kurdî qise nîkenî, la vanî ma welatparêzî. Yewbînî ra Tirkî û ziwanê bîn qise kenî, la vanî ma welatparêzî.
Yew bi xo, xo qirbikero û wirzo vajo ez welatparêza. No çîyê raşt nîyo. Qijanê kî, Kirdkî-Zazakî,Kirmanckî,Dimilî- nîzanê ey qijî kam hew ziwan qise kenî, benî ayê a netewî.
Kam kî, qijanê-tut- înan Kirdkî nîzanê, la Tirkî, Almanî,Îngîlîzî, Fransî,Îtalî ze nayê ziwanên zananê, eyê gera ze welatparêz nîyerê hesabnayîş.
Na raştîyekîya. Bena, zorê tayî merdiman bişo. Bena, vajenê ma xo ra Kurdî. La raştî tewirek bîna.
Îslam de zî yew qise esta, wanî mûnafiq. Yanî kesê kî, vajenê ma Îslamî, la ze dînê Îslam wayîrê edeb û terbîyê nîbi, înan ra vanî mûnafiq.
Ziwan zi hina yo. Kam kî, vajê ma Kirdî, la ziwanê Kirdkî qise nîkero, hetê welatparêzî de mûnafiqê.
Welatparêziya erzan û di rîyî nêbena.
Qijanê xo ra Kirdkî me musenê,ristimê xo qirbiker, la vaje ez welatparêza.
Na welatparêzî, wa bikewro bin erdî.
Na welatparêzî nîya. Na rotişê welatparêzîya.
Welatparêzî, wayîrê ziwan vejîyayîşa.
Welatparêzî, wayîrê tarîxê xo vejîyayîşa.
Welatparêzî, wayîrê erdê xo  vejîyayîşa.
Welatparêzî erdê xo terkerdiş ne, ser erdê xo de ciwîyayîşa.
Welatparêzî, seba erdê xo şer kerdişa.
Welatparêzî, rojname Tirkan boykot kerdişa.
Welatparêzî, ze rojnamê veroj girewtiş û wendişa.
Welatparêzî, ver heme çîyê welatê xo de mendiş û Kirdkî qisekerdişa.
Welatparêzî, mektebê Tirk boykot kerdişa.
Welatparêzî, mektebê Kirdkî-Zazakî, Kirmanckî, Dimilî- awankerdişa, akerdişa.
Welatparêzî, teberê welatî de ça bena wa bibo, heme ca de ne bi ziwanê dişmenê xo , bi ziwanê xo nuştiş,wendiş û qisekerdişa.
Welatparêzî,  tenê rojê ziwanê dayî û roşanê ziwanê Kurdî de ne,zerrê keye de, tebere keye de, bazar de, mekteb de û heme ca de bi Kirdkî qisekerdişa.
Welatparêzî, Kirdkî fikir kerdişa.
Welatparêzî, Kirdkî heyal dîyayîşa.
Welatparêzî, hewne xo di Kirdkî-Zazakî- qise kerdişa.