Sifteyin şarê ermenî, çerkes, suryanî, kurd, ereb, tirki, dorûverê sosyalîst, komunîst, oldar, cenî û ciwan bi kamîya xo Meclîs de cayê xo girewtbî labelê no rengînîya Meclîsî ra AKP û Erdogan nêrehet bîyî.
Peynîya weçînayîşî zî dest pê polîtîkayê provokasyonî kerdî. Sifteyin projeya Rayverê Şarê Kurd Abdullah Ocalan Ravêreyeya Çareserî têk berdî û peynî zî çeteyê DAIŞe ra hetkarîya xo zêdînayî. Peynîya nê planan zî sifeyin Pirsûs û peynî zî Enqereye de ciwanê sosyalîst, elewî, kurd û bindestan qetil kerdî. Nika 1’ê Teşrîne de weçînayişek esto, ganî nê weçînayîşî de heme şaranê Tirkîyaye HDPe ra hetkarî bidî, çimkî verê AKP û Erdoganî tena HDP vindena. Çarçiweya demokratîkbîyîşê Tirkîyaye de HDP xebatê xo domnena. Namzedê HDP a Amedî Nesrîn Şanli û Edîp Berk xebatê xo
Namzeda wekîlîya HDPe Nesrîn Şanli û Edîp Berk seba armancê înan a weçînayîşî, xebatê HDPe û weçînayîş de hedefê xo yê ser qise kerdî.
Serkewtişeko gird
Namzeda HDP a Amedî Nesrîn Şanli vat ke yeno zanayîş ke AKP verîya weçînayîşê 7’ê hezîrane de vatênê ke HDP nêşkena bendê weçînayîşan bivîyarno la wexto ke netîceyê anketan ra ewnîya û fam kerd ke HDP do bendî bivîyara, aye wext dest pê konseptekê şer a lêmin kerd û wina vat: “Çarçiwaya no konseptî de bi seyan buroyê HDPe day adirî ver û veşnay. Wexto ke ewnîya nêşkena tercîhê şarî bibedilno, 5’ê hezîrane de Amed de bombe teqnayî. Ma bi nêy hêrişan dekewtî weçînayîşê 7’ê hezîrane û her çende ke hende hêrişî amey kerdiş zî HDP serkewtişeko gird dest vist. AKP zî no serkewtişî qebul nêkerd û dijî no serkewtişî konsepta şerî hîna hîra kerd û hêrişê xo vêşî kerdî.”
Projeya xorayîrberdişî
Namzeda HDP a Amedî Şanli destnîşan kerd ke ravêreyeya çareserî hetê AKPe ame xirakerdiş, labelê no xirakerdiş zî eşt ser HDPe, semedê ke AKP û Erdogan sereyê xo de xora serkewtişê HDPe qebul nêkerdbî û planê weçînayîşeko newe viraştbî, çimkî verê ra bire girewtbî û xo hezey ke bibo îqtîdar hesibnaybî.
Şanli wina domna: “No semedî ra şero ke taybet qezayanê ma sey Cizîr, Farqîn, Gimgim, Bismil, Sûr û sewbîna cayê ke HDP tede rayê vêşî girewtî de day destpêkerdiş. Semedê çi nêy qezayan de şer day destpêkerdiş? Çimkî bi nêy polîtîkayan waşt sifteyîn çimê şarê nêy qezayan bitersnî û şarî weçînayîşî ra serd bikerî. Bi no hawa zî vat qey do rayanê HDPe kêmî bikero û rayna bibo îqtîdar. Hemverê nêy şerî sendîkayan bira mîtîngekî aştîye girewt û semedê ke aştîye bibo serwer, şîy Enqere.”
Qirkerdişê Enqereye
Şanli bal ant ser bira KCKe ya bêçalakîtîye û wina dewam kerd: “Rojake KCK, bira bêçalakîtîye da,heman roje de Enqere de teqyayîş virazya. Tîya de semedê çi bombeyî amey teqnayîş? Çimkî êy ke tîya de bî, sendîkavan û hetgirê ke aştîye waştênê bî. AKP zî bi nê çalakîyan hedef kerd ke KCK do rayna dest pê şerî bikera û çimê şarî de bêra sîyakerdiş. Çimkî wexto ke KCKe bira bêçalakîtî girewt çimê şarî de zaf bîyaye amey dîyîş û semedê na bire paştî amey dayîş. Her çende ke AKP bi no hedefî nêy bombeyan day teqnayîş zî KCK vat ke înan semedê ke soz daya şehîdê Qirkerdişê Enqereye, êy do bêçalakîtî bidomnî. Ma bi no hawa heta eyro amey.”
Provokasyonê AKPe
Şanli îzeh kerd ke wexto ke merdim nê rojan ra ewnîyeno, merdim vîneno ke AKP mîyanê planê newe de ya û çarçiweya nê planî zî tîmê newe amey viraştiş, nêy tîmî zî tifaqa beyntarê AKP-DAIŞe de ameya awankerdiş û eyro nêy qezayanê ma de hêriş benî şare kurd ser û wina peynî kerd: “Erdogan û AKPe bi rojan vejyayîşê teberî qedexe kerdî û tutanê ma zî qir kerdî. Semedê ke nêverda şar domanê xo bideko bin herre, laşê domanan mîyanê dolaba qeşayî de ame tepiştiş.”
Hewna wekîlê HDP a Amedî Edîp Berk zî vat ke nêzdîyê 8 aşme ya ke ma mîyanê xebateko giran de yî, ravêreyeya Newrozî ra dima ê dayê destpêkerdiş û heta nika no hawa domyeno û wina vat: “Ez no demî hetê xo de kena di beş. Beşekî heta 7’ê hezîrane yo, ya bîn zî 7’ê hezîrane ra heta nika yo. Ravêreyeya ke heta 7’ê hezîrane de bi xebateko xeylê hîra ma da meşnayîş. Xora aye wext de ma faşîzmê weçînayîşî cuyay. Nêy faşîzmî ma hetê aborîye de cuyay; semedê ke partîya ma hetê malîye de ti paştî nêgirewt. Reyna ma hetê sîyasî de cuyay; serekkomar ganî bêhet bibînê, labelê Erdogan paştîya xo day tena partîye. Hetê nê paştîdayîşî, awayo akerde hemverê partîya ma dişmentî kerd û ma mîyanê hewayekî inasar de cuyay.”
Eleqeya şarê Amedî
Wekîlê HDP a Amedî Berk ciresna ke netîceya nêy fikran de nêzdîyê 150 cayan de ê raştî hêrişan amey, tewro peynî zî Raşteya Îstasyonî de teqyayîşeko gird virazya û netîceya êy de bi seyan merdimî birîndar bîyî, desan hebî zî şehîd kewtî û wina domna: “Ma ravêreyey de zaf xebetyay û ma şîy Meclîsî, labelê ma weyra de dîy ke bi seyan wekîlê ke eleqeya înan şar û persgirêkanê şarî rey çino estbî. Kesê ke weyra de bî şarî ra vîşêr pawitişê dewlete kerdênê û êy ke ameybî meclîsî zafaneyê înan mutehît, merdimê karî û sewbîna bî. Bade semedê sondwerdişî, weçînayîşê serekê Meclîsî, weçînayîşê endamê RTUKe û yew zî semedê ke CHPijekî cipersnameyeke (gensoru) daybî sero ma Meclîs de ronîştbî.”
Berk vat ke Erdogan destûr nêda ke Meclîs bixebito, çimkî Erdogan û AKP weçînayîş waştî, mîyanê no hukimatî de zî bi giranîya înan ke burokratan ra virazîyeno, estî û nêy kesî zî kesê ke verîya nika no hukimatî ra emir girewtênê yî û yanî heme wezaretê no hukimatî kesê ke eleqeya xo îradeya şarî çino reyde amey pirkerdiş.
NAVENDA XEBERAN