Dewletan gelek çî bê wate kerdo. Nînan ra yew zî nuştiş o. No new rojî yo ke ez fikirîyena ka binusa yan menusa. Çunke wata nustişî zî ma het de nêmendo û wext wextê nustişî ney wextê pratîkî yo. Wextê şerî yo. Naye ra teber çi çî ma nêreyneno la fina zî merdim binuso beno ke baş bo.
Şerê Rojawanê Kurdîstanî 9ê Teşrîna verêne de dest pêkerd. Yeno zanayene 9ê Teşrîna verêna 1998î de komployêka mîyandewletî ameye aver vistene û peynîye de Rayber Apo kewt destê dewleta Tirke. Na komplo de amanc o bî ke sere de Tevgerê Azadîye çin bikerê, şerê Kurdan û Tirkan bivejê. Rayberîye zaf cehd kerd û vernîya şerê Kurd û Tirkan girewt la bedelê ci zaf vay bi.
Fina 9ê Teşrîna verêne Rojawanê Kurdîstanî ser o yew komplo ameye aver vistene. Fina amanc o yo ke Tevgerê Azadî bêro zeîf kerdene, şerê bêpeynî yê Kurdan û Tirkan bêro destpêkerdene, Rojawanî de heqê şarê Kurdî nêmano. Hesabê bînî zî estê la yê esas nîyê.
Serra 1998 de komplo bi destê Amerîka û xeylê dewletanê bînan ameye kerdene. Emser û na menge de zî fina a roja sîyaye de komplo ameye aver vistene. Xora weçînayîşê roje ra zî merdim fam keno ke yew komplo ya û destê dewletan tede esto. Sere de Amerîka û Rûsya gelek dewletî na komplo de ca gênê. Bi caardişê komplo zî verdanê dewleta tirke ra. Kordînator zî Erdogan o.
Tam new rojî yo ke şarê ma êş û azaranê girdan reyde rî bi rî yî. Tena Kurdî ney sere de Ereb û şarê bînî ke rayîrê azadîye û demokrasî weçînayo, êş û azaran ancenê, benê koçber, benê dirbetin, şehîd kewenê.
Çîyo ke na meqale de ez ser o vinderî: xoverdayîş û bi îradeyêka pola şerkerdişê şerwanan o. Şarê ma mîyan de xîyanet xorîn o. Ma naye zanenê. Rojawan de zî xayînî tay nîyê la bêrê bivînê şerwanî senî şer kenê û her şerwanêk senî destanan nusneno. Çi cinî bo ci camêrd, winî şer kenê, kesê matê ci mebo nêmerdim o. Bi temamî şerwanî bi hêrsêko girdî xover ro danê. Teknolojîyo tewr raver destê dewleta faşîste de yo. Dewlete îstîxbaratê xo pêt kerdo. Firokeyê keşfî vînenê û firokeyê şerî yenê danê piro. Dişmen bi teknolojîyî şer keno la şerwanî bi îrade, bawerî şer kenê. Nêzana teknolojî ser keweno yan îrade ra, hiş, îrade û rêxistinbîyayîş ser keweno? Eke Kurdî heta nika bi îrade û bawerî şer kerdo û çin nêbîyê, wata xo o yo ke bawerî, îrade û heqbîyayîş ser keweno.
Nê rojan de ma çi sosretî dîy. Ma kewtiş û teresî dîy. Ma canik û camêrdî dîy. Ma dî ke eke xoverdayîş, şerkerdiş estbo hesabê dewletan yeno xeribnayîş. Ma dî ke a Amerîkaya gewende gewendeyêka senîne ya. Ma dî ke înan de hest, exlaq, wijdan çin o. Xora ma zanayêne ke nê wina yê la ma bi çimanê xo dî. Xoverdayêşo tarîxî ra pey fina dewletî yenê pêser. Pêvînayîşan virazenê. Wazenê ser serê ma de plananê newîyan bironê. La ê ser nêkewenê. Ê ser bikewê zî serkewte nîyê. Çunke ê merdim nîyê.
Gelê Kirmancan! Peynîye de naye vajî: şima piştîyêka başe nêda kurdanê Rojawanî. Şarê Dêrsim û Amed, şarê Şêx Seîd û Sey Rizayî, şima piştîyêk nêda Rojawanî. Ez lava nêkena la merdim ê û waye û birayê şima êdî bi çekanê kîmyevîyan yenê kiştene. Bêrê xo ser çîyêk bikerê! Welle şima poşman nêbenê. Eke roja merdişî nêzdî bîye, şima poşman nêbenê û seba piştîdayîşî benê zerrîweş.