Otelê Madimakî yê Sêwazî de 2’ê Temmuze 1993’î de çeteyî ke dewlete hetkarî daynî 33 roşnvîr û hunermend qetil kerdî, çi heyf ke ser no qewimyayîşî 23 serr vîyart labelê hema zî çeteyî ke roşnvîr û hunermendan qetil kerdî nêameyî dariznayîş. Malbatê şehîdê Madimakî babete ser aşkera kerdî ke hetanî kerdoxê no qewimyayîşî bêrî cezakerdiş ê do xoverdayîşê xo bidomnî û dîyar kerdî ke ê ke Madimak veşnayî eyro zî şaristanê kurdan veşnenî û no ser zî ganî no averşîyayîşî ra vind bêro vatiş.
Biyê wekîl, wezîr
Dayîka Ozlem Şahîn, Fîdan Şahîn dîyar kerd ke ê 23 serr verî ameyî qetilkerdiş û wina vat: “Ê ke kêna û 33 canê ma qetil kerdî, eyro bîyî wekîl, serekê Dadgeha Berz î. Hema zî qirkerdiş kenî. Pirsûs, Sûr, Nisêbîn û Cizîr de kesî ke qirkerdiş kerdî, eynî demî kerdoxê Madimakî yî, çi heyf ke no zîhnîyet her ke şono wayîrê hêzî beno la ma do dijî no zîhîyet de xoverdayîşê xo ra fek veranêdî. Pîrê ma Pîr Sultan Abdal xover da, ma zî do xover bidî. Ma qet milê xo çewt nêkerd, ma dê nêkerî zî.”
Kiriştişê tifingan
Pîyê Hurîye û Yeşîm Ozkan, Hîkmet Ozkan zî ciresna ke zîhnîyetê Emevîyî hewna ganî bîyo û qirkerdişê xo domneno û wina dewam kerd: “Yezîdo kiştox ra nika qirkerdiş înan ra yeno kerdiş, no zîhnîyet xo bi qirkerdişan miqate keno. No ser zî elaqayê nê kesan qet muslimanî reyde çin o. Nê zureştiş, nêrayîrî û dizdeyî xo ra kerdî zey gureyêk. Rayîrê nê kesan rayîrê Muavîyeyî yo. Muavîyeyo ke Qesr de ronişeno, her roj çeteyê DAIŞ ra bi TIRan çek eşraweno seba qirkerdişî la ez bawera wayîrê no zîhnîyetî do têk şîrî.”
DÎHA/ENQERA