Maya Medenî Fahrîye Yildirim nayî zey korbîyayişê wijdanî biname kerd.
6. Roniştişê dawaya Medenî Yildirimî ke serre ke 28ê Hezîrana 2013î de ame kiştiş, Mahkemeya 7. yê Cezayê Giran de vîniya. Kiştox Adem Çîftçî girotxaneyê Kocaelî ra ser sîstemê SEGBÎSî tewr bi. Maya Medenî Fahrîye Yildirim ra pîya parlementerê HDD Zîya Pîr û pawitoxî tewr bî.
Ronişten de sifte Fahrîye Yildirim qisey kerd û aşkere kerd ke xo ra her çî werte de yo. Edalet ti wext çareser nêkena. Yildirim vist vîrî înan 2 serrî pawitî ke dawa abîyo û va, ’her çî meydan de yo, sûcdar Adem Çîftçî yo.’
‘Wazîyeno ser bîyayiş bîro girotiş’
Pawitox Mehmet Emir Aktarî zî da zonayen ke versûc roja ewil ra na het îfadeyanê tezad dano û va, ‘îfade de versûcî sifte ard zon ke eyî bi fermanê fermandarî gule rijnayo. Dima ra va ke eyî gule nêrijnayo.’ Aktarî da zonayen ke bîyayişa ke bi merdişê 1 kesî û dirbetinbîyayişê 10 kesan bi netîce bî de dozgerî tenya derheqê 1 kesî de dawa akerd. No zî damûsneno ke dozger wazeno ser bîyayişî bigîro. Aktarî vist vîrî ke Medenî zerreyê nûmayişkaran de bi û destê ci de teba çinêbî û waşt ke derheqê fermandar û sermîyananê qereqolî de dawa bîro akerdiş.
Pawitox Reyhan Yalçindag zî waştena cezakerdişê versûcî û kesê ke gule rijnay ard zon. Yalçindag aşkere kerd ke versûcî çend reynî ard zon ke eyî bi fermanê fermandarî gule rijnayo û va, ‘Cografyaya ma de wezîfedarê tîvarî yenê pawiten, na dosya de zî durum wina yo. Versûc Adem Çîftçî zî vatenanê, ‘mi Medenî nêkişt, wa wijdanê malbatî’ rehet bo’ dima ra waştena bereatê xo kerd.
Yildirim: ’Edalet nêmenda’
Îfadeyan ra dima heyetê mahkeme derheqê Versûc Adem Çîftçî de qerarê bereatî da. Heyetî îdia kerd ke derheqê ‘Bi qesit kiştişê merdimî’ de delîl nêame vînayen û îtiraf kerd ke ‘Derheqê dawa de cipersyayişeke bi tesîr nêame ramiten.’
Maya Medenî Fahrîye Yildirim qerarê mehkeme rê nêrazîbîyen damûsna û va, ‘wijdanî bîye kor, ez sevaja. Ne dozger, ne hakîm, pêrokîn veng ê, edalet nêmenda. Ez a heta peynî taqîpkarê na dawa ba.
ANF / AMED