28ê Hezîran 2013î de qezaya Amed Lice de, dewleta tirk qereqolê newî viraşt. Ronişteyê Lîce bi panqarta ‘aşitî wazemê’ hetê qereqol şî û nêrazîbiyenê xo damusnay. Wextê protestokerdinê viraştişê qereqolî de, eskeran gule vornay nûmayişkaran ser û gencê Kurd Medenî Yildirim qetil kerd.
Badê 2 serrî dawa rabiya
Derheqê biyayiş de cipersyayen abiya. Derheqê dosya de qerarê nimiten ame dayen. Aşma Gulan 2014î de dîmenê êrişê eskeran vejyay teber, la rexmê nay kes nêame sûcdar kerden. Herzewbîn cayê biyayiş de 200 ra vêşî qewanê guleyan amey vînayen. Fina ame tespîtkerden ke, êriş de 26 tifingî amey şixulnayen. Dawa aşma Îlon 2015î de abiya. Tenya versûcdar Adem Çîftçî yo. Heta nika îfadeyê Çîftçî nêame giroten. Rexmo ke fermandarê qereqolê Kayacik Mustafa Ozturkî îtiraf kerd ke fermanê êriş ey dayo, zey versûc îdianame de ca nêgirot. Herzewbîn sermiyananê bînî ra zî kesî ca nêgirot.
Roniştenê sifte 15 deqe ramiya
Roniştenê sifte yê dawa 27ê Cotmeng 2015î de destpa kerd û tenya 15 deqe ramiya. Versûc Çîftçî tewrê ronişten nêbi. Pawitoxê malbatê Yildirimî waşt ke versûc bîro tepişten. La heyetê mahkeme aşkere kerd ke, ê hewna nêweynayê dosya, derheqê dawa de detayan nêzanê, nayî ra dawa taloqê 8ê Kanûn kerd.
Tîmanê taybet ferman da
Roniştena diyîn yê dawa 8ê Kanûn de, mahkemeya cezayê giran yê Diyarbakir de amê vînayen. Versûc Adem Çîftçî bi sîstemê SEGBÎS tewrê ronişten bi. Herzewbîn piyê Berkîn Elvan, piyê Mehmet Ayvalitaş, parlamenterê HDP Selma Irmak û Feleknas Ûca zî tewrê ronişten bî.
Versûc Çîftçî îfadeyê xo de aşkere kerd ke, sermiyananê ey fermanê “piro de” da û va, rexmê no fermanî ey gule nêeşt. Çîftçî îdia kerd ke, ey perwerdeyê tifing nêgiroto, o roja biyayiş de ver tifinga BKC bi û ard ziwan ke, badê kiştişê Medenî, eskeran bi ey ra henek-kuşat kerdiyê. Çîftçî vistvîrî ke, bado ke tîmê hereketê teybet amey, biyayişî qewimiyay û ard ziwan ke kiştişê Medenî de mesûliyet ser tîmanê teybet de yo. Çîftçî va: “mavêna qereqol û ê însanan de mesele çinîbî. Înan ma ra hes kerdî, ma her tim piya bî. Ez senî şena gule berza îynan. Tîmanê teybet bombeyê gaz eştî, gule rijnay ser nê însanan. A roj mi qet gule nêeşt. Tifinga mi eskeranê bîn şixulna.
‘Medenî hedef ame giroten’
Badê versûc maya Medenî Yildirim, Fahriye Yildirim amê goştarey kerden. Yildirim va: Ez pey gerreyê xo de ya. Ganî-gerek fermandarê qereqol û pêrokîn sermiyanî bîrê mahkeme kerden. Vatenê versûcî pêrokîn zûrrî yê. Cayo ke Yildirim ame kişten hedef de bi.
Pawitox Reyhan Yalçîndag zî badê îfadeyê versûc Çîftçî waşt ke cipersyayen bîro hera kerdin. Herzewbîn waştenê mahkemekerdişê sermiyanê bînî û tepiştişê versûc Çîftçî kerd. La heyetê mahkeme no waşten red kerd. Herzewbîn qerar ame dayen ke fermandarê qereqol bîrê goştarî kerdin. Heyetê mahkeme roniştenê bîn yê dawa eşt 2ê Adar 2016.
DÎHA/AMED