28'ê Hezîrana 2013’ê de, wextê protestoyê viraştişê qaleqol-qereqolê dewa Hêzan ê Licê de gencê kurd Medenî Yildirimı 19 serre bi guleyanê leşkeran ame kiştiş. Ser merdişê Yildirimî ra 4 serrî vîyartî, la hona zî kiştoxî nêamey cezakerdiş. Maya Medenî Fahrîye Gunduz Yildirimî da zanayîş ke heta ke kiştoxî nîrê cezakerdiş ê dê dawa ra fek veranêdê. 

Fahrîye Gunduz Yildirim vist vîrî ke rixmo ke ser kiştişê Medenî ra 4 serrî vîyartî zî, dejê ci zey roja ewil a. Yildirim îşaret kerd ke hona zî kiştoxî teber de yê û vist vîrî ke roja ke lajê ci ameyo kiştiş ra na het ê bi tîşorta bi gonîn yê lajê ci rojanê xo ravêrnenê. 


Ez her roj vera bêedaletî sere wedarnena

Dayik Yildirim vist vîrî ke yê ke Medenî kişt û yê ke fermana kiştişî zay zî dîyar ê. Yildirim da zanayîş ke la werte de na sûcdar û ne zî cezayek esto û wina dewam kerd: “Ma şima zanê no rewş seba dayikekê rê çi qes zor yeno? Ez her roj vera na bêedaletî sere wedarnena. Hinî tenya seba Medenî Yildirimî ez xemgîn nêbena, her roj hendayî çîyî benê ke mordem hinî nêşkeno texmîn zî bikero. Ma prosesêko zaf zehmet ra vîyardî, la ma ser payan de mendî. Ma xover danê û pey heqê xo de yê. Tenya waştena ma naya ke kiştoxî bîrê cezakerdiş û bicaardişê edaletî yo.” 

Dayik Yildirim vist vîrî ke nika Licê bin dorpêçî de yo û wina dewam kerd: “Her roj însanî yenê qetilkerdiş. Wesayîta zirxî 5 kesan pelçiqna. Se vanê? 'Qeza'. Do kam nayî rê emel bikero. Ma emel nêkenê. Do kiştoxî bîrê cezakerdiş, nê. La se beno wa bibo ma dê pey kiştoxan vera nêdê. Sûr yeno welişnayîş ma no edalet o? Ge ge ma dejanê xo zî kenê xo vîr ra. 


Seba her kesî edalete

Fahrîye Gunduz Yildirimî hayr ant "Meşa Edaletê" ya ke Anqara ra amê destpakerdiş û roja 15. de ramena ser o û wina va: “Ma na meşe zaf biqîmet vînenê. Welatê ko bê edalet welatêko vindî yo. Nika Tirkîye zî na rewşe de ya. Eke ez bişêra ez do zî tewrê meşe biba. Tenya seba Medenî nê, seba her kesî dawaya edaletê kena. Hona zî na cografya de edalet çin a. Wexto ke ma xoverdayîşeke pîyayî bidê ma êşkenê edaletî bîyarê. Ganî meşa edaletî seba yew kesî nêbo, seba her kesî bo û ganî ma vengê xo berz bikerê. Ganî meşa edalet seba Licê, seba Sûrê, seba Medenî, seba tepişteyan bibo. Eke na meş bireso mexsedê xo, do seba Medenî zî edalet bîro.”  


 DÎHABER/AMED