KNKyî 34 partî û organîzasyonan ra yeno pê, vera hêriş û dagîrkerîye de kombîyayîşê tewirê neteweyî viraşt. Kombîyayîş ra dima encamname ame weşênayene û encamname de hêriş û dagîrkerîyê Îran û dewleta Tirkî ameyî mehkûmkerdene û ame waştene ke wa vera dagîrkerîye de xoverdayîş gird bibo.
Kongreya Neteweyî ya Kurdistanî (KNK) encamnameyê kombîyayîşê tewirê neteweyî yê vera dagîrkerîya dewleta Tirkî de vila kerd. Kombîyayîşê tewirê neteweyî yê vera dagîrkerîya dewleta Tirkîya 27ê Temmuze de paytextê Belçîka Bruksel de amebi destpêkerdene. Kombîyayîş ra dima encamnameyê kombîyayîşî ame weşênayene. Encamname de ame vatene ke bi vengdayîşê Komîteya Dîplomasî ya Hempare ya partî û organîzasyonanê sîyasîyan ê Kurdistanîyan de binê sîwanê KNKyî de ke 34 partî û organîzasyonan ra yeno pê, 27ê Temmuze de Bruksel de Kombîyayîşê Tewirê Neteweyîyî yê vera dagîrkerîya dewleta Tirkî de ame viraştene.
Dewamê encamname de ameyo vatene ‘seke yeno zanayene nê 30 serranê peyênan de welatê ma halêkê neweyî dir têrî yo û serra 1991 de Başûr de û dima ra zî Rojawanê Kurdistanî de di îdareyê xoserî bica bîyî’ û wina dewam kerdo: “Ma rind zanê ke ne Îran û ne zî Tirkîya çi rey nê statuyê Kurdan qebul nêkerdê û her tim waşto ke bi çi hawayî beno wa bibo, nê statuyan xira kerê, eke înan ra nêro zî bêtesîr verdê û bikerê binê ablûkaya polîtîk, leşkerî û ekonomîke. Nê prosesî de Îranî ge-ge bi bêvengî, reyan zî bi hêrişanê eşkereyan problem vetî. Başûrê Kurdistanî de xeylî reyan kampe û baregehê partî û organîzasyonanê Rojhelatê Kurdîstanî yê Koyê û serê sînoran bombardûman kerdî û bi desan kesî şehîd kerdî. Nê rojanê peyênan de zî ancî hêzanê Îranî hêrişê Başûrê Kurdistanî kerd.”
Dewleta Tirkî wazena Başûr û Rojawanî dagîr bikero
Encamname de bale ancîyayo hêrişê dagîrkerîye yê dewleta Tirkî ser û ameyo vatene ke dewleta Tirkî hêrişê her parçeyê Kurdîstanî kena. Encamname de wina ameyo vatene: “Dewleta Tirkî sey dagîrkerêka pîle, hetêk ra mîyanê sînoranê xo yê fermîyan de zulmêkê pîlî şarê Vakurê Kurdistanî ser o kena, hetêna ra zî çim dayo parçeyanê Başûr û rojawanê Kurdistanî û dest bi dagîrkerdişê hîrayî kerdo.”
Vera dagîrkerîye de tewir ramojnê
Peynîya encamnameyî de wina ameyo vatene: “Dimayo ke rojawanê Kurdistanî de îdareyo xoser virazîya, dewleta Tirkîya konseptê hêrişkarîya xo kerd newe û planê xo yê dagîrkerîya pêroyîye da destpêkerdene. Ezaz û Cerablûs ra dest pêkerd û tewr peynî zî Efrîn dagîr kerd. Nika zî amadekarîya dagîrkerîyêka hîrayêre kena û verê xo dayo Kobanê, Girê Sipî û Cizîre ya Rojawanî. No pozîsyonê dewleta Tirkî ya hêrişkar û dagîrkere bi hawayêkê xeylî aktîfî dewam keno. Dimayê dagîrkerîya Efrînî dewleta Tirkî bi hawayêkê sîstematîkî Efrîn de sucanê teberê merdimîye kena. Demografîya Efrînî vurnena û dewlemendîyanê serê erd û binê erdî talan kena. Seba hemverê hêriş û dagîrkerîye de tedbîrî bêrê girewtene, ma sey beşdaranê kombîyayîşî veng danê KCK, PDK, YNK û heme hêzanê Kurdîstanî ke rew bêrê têhet û vera dagîrkerîye de tewirêkê hemparî ramojnê.”
ANF/BRUKSEL