Peroj o. Tîjade weşe ya payîzî hîna ma kena germ koyê Şengalî de. Pêro mamosteyê Serdêştê dibistana Ş. Bapîr de kom bîyê. Ê danamusê bidê raya pêroyî. Ê bi danamuse dagirkeriya dewleta tirk şermezar bikerê. Şand û şewê Koyê Şengalî serd bê kî bi roje Şengal hîna germ o. Tîja xo ya comerde hîna ma kena germ. Mi va ya tîjade zaf weş a.
Peyê danamusî mamoste Naîf nêzdîyê mi bî û bi vengode nazik va:
-Ma şîme lewê ma peroj biwerîme.
Seba ke kêyeyode bîn nas bikerî fersendode weş o. Mi no fersend qet nêremna. Ma verê xo da holika mamoste Naîf î. Xora holike nêzdîyê mektebî ya. Ma çend deqeyan de reştîme verê holike. Kêyeyode qelebalix o. Yê ke asayenê, yê ke amayî verê mi selam da mi zîyaderî kênekê. Hîrê kênekî hama ti vana qey serrê înan eynî yê. Û domanê hurîkî.
Bi ca musnayîşê yewa înan ra ez ser sekuyo ke kîşta hardo ke nêzdîyê panc metroyan bi fayansanê şalênan viraziyayo de nîşta ro. Şênîyê keyeyî bi keyf ê. Tewr ziyade kî domanî şên ê, bi xo ra dora xo kî kenê şên. Domanê hende rindekê ke! Heval tewr qickek o. Hîna çiçik limeno. Cayê xo de nêvindeno. Yewo sîsîk û çim kesk o. Canê, Lîna, Azad(azad dibêje nameyê min o harekî azad o) û Hamîd Hevalî ra kêm nêmanenê. Heta ke werdê perojî ame ez bi înan bîya şad.
Ya ke tewr zîyade bala mi ancena maya Naîfî ya. Seba ke ez ci ra vana dayê nameyê ci persnêkena, nameyê înan çi bo kî ê dayîkê. Rind o peyê werdî dayê çaya xo gurete ameye lewê ma de nişte ro. Sey her tawî persa min a yewîne:
-Dayê to çend domanî ardê?
Dayê bi huyayîşî, huyayîşê xo kî hende rindeko ke, cewabê mi da:
-Yewendes.
-Ooooo bi rastî dayê? Ma ti hîna zaf genc asayena.
Reyna rindek rindek huyena. Ez wazena her bihuyo. Huyayîşê xo zereyê mordemî aresneno ra. Ez persanê xo domnena:
-Ma dayê ti çend serrîya xo de zewecîya?
Ez cewabî ra qet mat nêmanena.
-Nêzanena. Ez çizanena mi hîna mîyanê zibil de kaykerdênê pîyê mi ez gureta daya.
Ez se vajî. Hîkayeyade zaf nas a. Hîkayeya ke mi verê zaf cinîyan ra heşnaya. Hîkayeya ke hêrsanê mordemî kena ra. Hîkayeya ke didanan bi mordemî dana qirçnene.
Mabênê ma de tayê bêvengîyê virazîye. Ma bêveng qulme daye çayanê xo ra. Seba ke ez kasveto ke viraziya vila bikerî mi reyna pers kerd:
-Dayê eke dewa şima bêro xelesnayene şima şorê dewa xo ya îta vindêrê?
Rengê rûyê dayê vuriya. O ruyo geş şî ruyo de bîn ame. Rûyode dej in. Rûyode bi jan. Mi dî. Roja terteleyî rûyê aye de sey filmêk bîye. Ez persa xo ra poşman bîya la reyêk fekê mi ra vecîyabî. Îmkan çîne bî ke ez reyna pey de biçerexnî. Verê xo çarna mi, ma bi çimanê hîtan amaymi têçim, ê çime keskî çiqas rindek bî û aye va:
-Ma reyna şome deşte? Ma şîme dêşte ke daîş reyna bêro ma? Ma xo bidêrîme hetê koyî yo bîn.
Çekûya koyî hewayê ma vurna. Hewa reyna bî hewayê domanan.