Vakur û Rojhelatê Sûrîye ra vera tehdîdanê hêriş û dagîrkerîya dewleta Tirkî de reaksîyonî her ke şono zêde benî. Vizêr şewe Reqa, Derazor, Tebqa, Minbic, Girê Spî û Kobanê ra bi hezaran kesan ver bi qerargehê Koalîsyonê Mîyanneteweyî rayîrşîyayîşêk viraşt û hêriş û dagîrkerîye protesto kerd.
Hemserekê Meclîsê Caardişî yê Îdareyê Xoserî yê Vakûr û Rojhelatê Sûrîye Ebdilhamîd Mîhbaş û Bêrîvan Xalide zî rayîrraşîyayîş de cayê xo girewtî. Çalakgêran rayîrraşîyayîş de posteranê şehîdan, beyraqanê QSD û YPJyî akerdî û pankartî kiriştî. Çalakîye de Hetkarê Hemserekê Meclîsê Caardişî yê Herêma Firatî Mihemed Şahînî va ‘ma seba ke rîca bikerî, nêameyî tîya’ û wina dewam kerd: “Ewro welatê Ewropa, Asya û parzemînanê bînan de yî, saya ma de ewleyîye de yî. Ewro ganî hêzê mîyanneteweyî berpirsîyarîya xo bica bîyarî. Şarî vera terorî de bi hezaran şehîdî dayî.”
Wa hukmat tewirê xo zelal bikero
Bêrîvan Xalide zî daye zanayene ke sîyasetê dewleta Tirkî hetê herkesî ra yeno zanayene û ewro sebebê şerê mîyanênî yê Sûrîye zî Tirkîya yo. Serekê Partîya Ameyoxê Sûrîye Îbrahîm El-Qeftanî zî va ‘ganî hukmatê Sûrîye vera Tirkîya de tewirê xo zelal bikero û Mutabakatê Edene zî xo vîra bikero’ û wina domna: “Ganî Hêzê Koalîsyonî çi destê înan ra bêro, bikerî. Peymanê ke ameyox de bêrî kerdene zî ganî seba awankerdişê aştîye bêrî kerdene.” Çalakîye bi eştişê siloganan qedîyaye.
KOBANÊ