Bajaranê Rojawanî ra Kobanê netîceyê şerê giranî yo 5 aşman de 26ê Çileyê 2015 de bi temamî destê çeteyan ra ame rizgarkerdiş û ewro serrgêra 2. ya Azadbîyayîşê Kobanê ya. Wextê şerê Kobanê de seba ke Kobanê de erjê merdimîye ameyêne pawitiş, sere de çar parçeyanê Kurdistan û dima ra heme hetanê dinya ra kesî ameyî beşdarê xoverdayîşî bîbî.
Babete ser o şerwanê MLKPyî Cudî Firato ke Şengal, Kobanê û herêmanê tewir bi tewir yê Rojawanî de ca girewto, qisey kerd.
Şerwanê MLKPyî Firatî va ‘hêzê emperyalîstî polîtîkayê xo yê kaosî hêrişanê 11ê êlule kerdî mehne û gam bi game kerdî dewre’ û wina domna: “Proseso ke Amerîkaye Afganistan de dabî destpêkerdiş, ewro Lîbya, Îraq û Sûrîye de dano domnayîş. Welatê sey Amerîka, Tirkîya, Katar û Erebistano Siûdî vera rejîmê Baasî de piştî danî hêzê dînperestanê radîkalan û bi no hawa kaos vejenî û no kaos hema zî dewam keno û beno sebeb ke Rojhelato Mîyanên de her vîste de dengeyî bibedilyî.”
Waştî çinî bikerê
Firatî dewamê qiseykerdişê xo de va ‘sere de dewleta tirk û heme hêzê emperyalîstî waştî ke Şorişê Rojawanî bifetisnî’ û wina va: “Seba ke sîstemê kantonî seba heme şaranê bindestan rê alternatîfêk bî, dewleta tirk nêyî ra eciz bîye û bi çeteyan hêrişê şorişî kerd. Vera hêrişê ke 15ê êlule de dest pêkerd de şerwanê YPG û YPJyî destanêka gird nuştî. Wexto ke hema serkewtiş nêamebî qezenckerdiş, şorişgerê sey Arîn Mîrkane, Paramaz Kizilbaş, Gever, Hebûn Dêrik û Vîyan Peymane bi xoverdayîşê xo heme dinya dormeyê Kobanê de kom kerdî. Hêrişê ke hetê çeteyanê DAIŞî ra ameyî kerdiş ver Afganistan ra heta Afrîka, Ewropa, Avustralya û Amerîkaya Latînî merdimî weriştî lingan ser de.”
Destpêka peynîye bî
Firatî qiseykerdişê xo de va ‘serkewtişê Kobanê eynî wextî de destpêka peynîya çeteyan bî’ û wina dewam kerd: “Ez 3 serrî ra ver zî tîya de bîya û ewro reyna agêraya tîya; cok ra ez zaf biheyecan a. O wext ti kes Kobanê de nêmendbî û ma nêşînayêne hende bi hawayo rehet bimeşî. Ma saya bi seyan şorişgerê ke canê xo feda kerdî de ewro bi rehetî eşkenî tîya de bigêrî. O wext tebîet zî sey roja ewroyên keske nêbî, ewro tebîet de ganîtîyêk esto.”
Seba şorişgeran vengdayîş
Firatî peynîya qiseykerdişê xo de va ‘şero ke seba Şorişê Rojawanî ame meşnayîş, ganî seba şorişê Tirkîya zî bêro meşnayîş’ û qiseykerdişê xo wina qedêna: “Ruhê fedayî yo ke Kobanê de ame xelqkerdiş, ganî seba Tirkîya zî bibo. Adiro ke hetê Kawayo Asinkarî ra amebî tafînabî, ewro Kurdistan de destê bi hezaran kesan de sey meşaleyêk veşeno. Ma do şehîdê ma yê ke vera çeteyan de erjê merdimîye pawitî, qet xo vîra nêkerî. Ez veng dana her kesî wa seba girdkerdişê têkoşînî beşdarê têkoşînî bibî.”
MAHÎR YILMAZKAYA / ANF / KOBANÊ