Dr. Çagla Sevena ke teqayîşê Pirsûsî de bibî birîndar, muhîmîya serrgêra 1ê Teşrîna peyêne Roja Kobanê ya Dinya de qisey kerde. Sevene va ‘şarê Kobanê vera çeteyanê barbaran de xover da’ û wina dewam kerde: “Wexto ke her kes DAÎŞî ra tersayêne, şarê Kobanê şer kerdêne. Cok ra Kobanê nêkewte û do nêkewa zî.”
ZEYNEP KÛRAY / ANF/STENBOL
Birîndara Qetlîyamê Pirsûsî Dr. Çagla Sevene bi wesîleya 1ê Teşrîna Peyêne yê Roja Kobanê ya Cîhanî, ANF rê qisey kerde. Sevene qiseykerdişê xo de dîyar kerde ke Kobanê zerrîya aye de wayîrê cayekê cîyayî ya.
Sevene ard vîrî ke Kobanê vera tarîyîya DAÎŞî de semboleka pîl a xoverdayîşî ya û daye zanayene ke yew demo ke dinya bêveng û bêxem bî de şarê Kobanê vera nê çeteyanê barbaran de bi awayekê xurtî xover da û bî nîşanê hêvîye.
Sevena ke Fakulteyê Tibî yê Çapa yê Stenbolî ra mezun bîye, demo ke qerar daye ci ke şêra Kobanê asîstanîya nêweşîyanê domanan a Unîversîteya Marmara qezenç kerdîbî. Sevena ke seba pawitişê domanan xo kerdîbî amade, hetê ra no kar kerdêne hetê bînî ra zî nêeşkayêne ke na rewşe ver xo rabigêra ke domanê nêweşî, şerî ra serkewte cuye ra bêrê dûrîvistene. Sevene arde ziwan ke nê hîsî ra serkewte aye verê xo dayo Kobanê û wina domnaye: “Ma waştêne ke mîyanê şaran de bibîme pirdêk, ma waştêne ke domananê ucayî yê ke mîyanê şer û rijnayîşî de bîy rê bibîme hêvîye. Kêm bo zî ma waştêne ke birînanê şarê Kobanê têrabipîşîme.”
Sevene va ‘a nêeşkaya qebul bikera ke nebaşîye ke bi destê merdiman ameyê afirnayene ra serkewte domanî bêrê kîştene û bibê seqet û bi nê ferasetî ê kewtê rayîr la bîyê hedefê DAÎŞî’.
Oyo muhîm çinkerdişê zîhnîyetê DAÎŞî yo
Demê komkîştişî de organanê Sevene yê zereyî xisareko pîl dî û linga aye ya raste bi giranî bîye birîndar. Rêçê fizîkî û psîkolojîkî hîna zî aye ser o yê. Herçiqas ke qetlîyamî ser o çar serrî bivîyarê zî hîna zî travmaya qetlîyamî aye ser o esta. Sevene vana ‘yew rewşa ke sebebê travmayan kesê serdest ê, karêko asan nîyo ke merdim derbazê prosesê dima travmayî bibo’. Sevene bale ante ser ke hêrişê vera Rojawanî de seba dagîrkerîye yê û nîşan daye ke desthilatdarî her ke tengizîyenê bi neteweperwerî û kanperestîye hêrs û nefretî fînenê mîyanê merdiman. Sevene derheqê kîştişê Serçeteyê DAÎŞî El Bexdadî de zî Sevene wina va: “Kîştişê Bexdadî bi sereyê xo tena nêno yew mana. Çîyo girîng o yo ke ganî zîhnîyetê ey mîyan ra bêro wedaritene.”
‘Kobanê nêkewte do nêkewa’
Sevene peynîya qiseykerdişê xo de va ‘prosesê winasî de qasê xoverdayîşê Kobanê, xoverdayîşê serran ê Hêzanê Surîyeya Demokratîke ya vera tarîyîya DAÎŞî de zî gelek manadar û hêca ya’. Sevene dîyar kerde ke vera DAÎŞî yo ke her kes ci ra tersayêne, tena şorişgêrê Rojawanî dest bi xoverdayîşî kerd. Derheqê gefanê Erdoganî yê ke reyna Kobanê rê weno de zî Sevene va ‘Kobanê nêkewte do nêkewa.”