No 2-3 serrî yo ke Reqqa hetê çeteyanê DAIŞî ra amebî dagirkerdiş û şarê Reqqa zî mecbur mendbî ke ca û warê xo ra fek veradî û koçê sewbîna cayan bikerî. 5ê teşrîna peyêne de Şerwanê Odeyê Çalakîyan yê Xezebê Firatî bi nameyê hemleya ‘Xezebê Firatî’ da destpêkerdiş û heta nika çarçeweya na hemle de 34 dewe û 31 mezrayî çeteyanê DAIŞî ra pak kerdî. Pêroyî de netîceyê şerê 10 rojan de pêro pîya 550 km ard çeteyan ra ameyo pakkerdiş.
Şêlikê nê dewan ke mecbûr mendbî dewanê xo ra koç bikerî, xelisnayîşê dewanê înan yê destê çeteyan ra dima nika agêrenî dewanê xo. Nînan ra tayê verê xo Girê Sipîye û tayînan zî Eyn Îsa de bi ca bîy.
Ameyî pakkerdiş
Xelisnayîşê tayê dewan ra dima, mayînê ke hetê çeteyan ra ameybî bi cakerdiş, hetê Şerwananê Odeyê Çalakîyan yê Xezebê Firatî ra ameyî pakkerdiş. Badê ke tayê dewî çeteyan ra ameyî pakkerdiş, şerwanan destûr dayî şêlikanê nê dewan ke wa biagêrî dewanê xo. Na çarçewa de bi hezaran kesê ke şêlikê dewanê Hîşe, Towêlya, Sîda, Hezrîyat û Şibilî yî agêrayî dewanê xo yê azadan.
Îdareyê Xoserîya Demokratîke û Odeyê Çalakîyan yê Xezebê Firatî seba asankerdişê agerayîşê şêlikanê nê dewan, bi hawayo koordîne xebetîyenî. Hetta derheqê babete de komîteya ke 6 kesan ra pê yena, ameye awankerdiş.
8 hezar kes agêrayo
Komîteya ke ameya awankerdiş derheqê agêrayîşê dewijan de dîyar kerde ke badê ke hemleya xelisnayîşê Reqqa ameye destpêkerdiş ra nata xeylê dewe û mezrayî ameyî xelisnayîş û komîteye dewamê zanayîşî xo de va hûmara kesê ke agêrayî ca û warê xo resaya 8 hezarî. Pakkerdişê dewan hîna zî domîyeno.
Şêlikanê dewa El-Hurîye ra Xelîl Ebdullahî îzeh kerd ke ê semedo ke agêrenî dewa xo, zaf bikêfweş î û va dewa înan ra çeteyê DAIŞî bi temamî ameyî pakkerdiş.
Dewijan ra Xelef Ebdullxefûr El-Derwîş zî kêfweşîya xo ard ziwan û va ‘Sey ke ma newe ra welidîyayî.’
Mîyanê nê kesê ke kêfweşîya xo anî ziwan de domanî zî estî. Domanan ra Saîd El-Saîd zî va ‘êdî ma bi asanî ziqaqan de kayan kay kenî û ma tersê çeteyan ra pak bîyî.
ANHA / REQA