MUJDAT CAN / MA / WAN
Tewirê maseyan ra masepankê ke tena Gola Wanî de cuyenî, serre de reyêk awa sodayine ra koçê awa şîrine kenî. Koçkerdişê masepankan dest pêkerdo. Seke yeno zanayene masepankî wexto ke hakanê xo veradî mîyanê awe, awa sodayine ra vera xo danî awa şîrine û hakanê xo awa şîrine mîyan de verdanî.
Emser seba ke awe zaf a, koçê maseyan xeylê cayan de dest pêkerdo. Maseyî tersê şîpe de asnaw kenî. Wexto ke maseyî koç kenî, merdim vano qey firenî. Merkez û qezayanê bajarî xeylê kesî seba ke koçkerdişê maseyan bivînî, yenî temaşeyê koçê înan.
Nê cayan ra yew zî qezaya Erdîşî ya Wanî ya. Ewja de qaqlîbazî awe ser o firenî û ge-ge maseyanê ke xo awe de erzenî teber, tepîşenî û wenî. Reyna tayê maseyî zî xo erzenî zinaran ser û hakanê xo ewja de verdanî. Merdimê ke yenî temaşeyê înan, fotografanê înan ancenî. Nika seba ke wextê hakanê maseyan o, seydê maseyan qedexe yo.