HAMZA GUNDUZ / MA / COLEMÊRG
Bi ameyîşê hamnanî koçerê ke herêma Botan û Xerzanî de manenî, vera xo danî zozananê Colemêrg û herêma Serhedî. Koçerî bajarê sey Êlih û Sêrt ra vera xo danî zozananê Spîxanê û nizdîyê 3 aşmî tîya de manenî.
Koçerî dîyar kenî ke ê nêşênî germî ver heywananê xo miqate bikerî û hamnanan yenî zozanan, labelê polîtîkayê ewleyî înan danî zorî. Koçerî serê sibayî rew dest bi dotişê şitî kenî û heta mîyanê roje dotiş dewam keno. Şito ke yeno dotene reyde penîr û lor virazîyeno û roşîyeno rotoxan.
Koçeran ra Zekî Goçerî va ‘koçerî karêko zehmetin o’ û wina domna: “Ma Sêrt ra ameyî tîya. Ma zaf zehmetîyî antî. Zozananê tîya de zî zaf problemî estî. Eke qedexeyî dewam bikerî, ma do heywananê xo biroşî.”
Ma nêşênî heywanan zêde bikerî
Suheyl Yalçinî zî va ‘ma Êlih ra ameyî tîya’ û wina dewam kerd: “Ma aşma Hezîrane de yenî û Êlule de agêrenî. Ma bi kîrakerdişê erazî heywananê xo anî tîya. Seba ke destek nêdîyeno kesê ke karê heywankarîye kenî, vaya goşt û şitî zaf berz a. Eke destek bidîyo, o wext do hûmara heywanan zî zêde biba û no problem çareser bibo. Seba ke zozan û mergeyî yenî qedexekerdene, ma nêşênî heywananê xo zêde bikerî.”