Sûka Almanya Koln de, seba yadkerdişê şehîdanê Qereçox û yê Hardê Pawitenê Medya ke netîceyê hêrîşanê hewayî yê dewleta Tirk de weşîya xo kerdî vinî, merasîmê vîrardişî virazîya.
Merasîmê yadkerdişî hetê Sazîya Malbatê Şehîdan, Merkezê Civaka Demokratîk ê Kurd yê Kolnê û Meclîsê Cinîyan yê Viyan ra virazîya. Mordemanê şehîdan ra pîya bi desan Kurdistanijî tewrê merasîm bî. Vindertişê hurmetî ra dima ser nameyê Komîteyê Malbatê Şehîdan ê Ewropa Ahmet Aktaş’î qisey kerd û hayr ant hêrîşanê dewleta Tirk ser.
Kurdî dê serbikewê
Aktaş’î vist vîrî ke hêrişî cewherê xo de hemverê felsefeyê Rayverê Şarê Kurd Abdullah Ocalanî virazîyenê û aşkere kerd ke, şarê Kurd do rixmê nê hêrîşan, bi wayîrvejyayîşê vîrardenanê şehîdan serbikewê. Dayika şehîd û endama Meclîsê Cinîyan yê Viyan Ayten Karadag zî ard ziwan ke, ganî hinî girêdayîşê bi şehîdan ra tenya bi sloganan ra sînor nêmano. Karadag hayr ant ser muhîmîya tewrbîyayîşeke xort ser û vengdayîşê berzkerdişê têkoşîn da.
Waya şehîd Perîhan Dersim zî va, "Şehîdê ma estena ma yê tewr erja yê. Înan hometê Kurd, Elewî, Sûnî û pêrokîn îtîqatan resnay pê. Ma dê wayîrê têkoşîna înan bivejyê."
Ser nameyê PYD zî Celal Rojava’yî qisey kerd û aşkere kerd ke ê vengê şehîdan ê û va, ‘eke ma girêdayê înan ê, ganî ma înan temsîl bikerê.” Mordemanê şehîd Ciwan’î zî ardî ziwan ke şehîdê înan şehîdê Kurdistanî yê û da zonayen ke zey malbat ê dê wayîrê têkoşîna înan bivejyê.
ANF/KOLN