Kolombîya de hukumet û gerîlayanê FARCî peymanê aştî îmze kerdî û peynîye lejê 52 ardî. Seba îmzekerdişê pêkerdişê haştî, bi tewrbîyayena hezaran kesan merasîmeke hera virazîya. 2500 kesê dawetkerdeyîyan çinayê (kinc) sipî yê ke sembolê haştî yê day xora.

Serokkomarê Kolombîya Juan Manuel Santos û lîderê FARC Rodrîgo Londono bi nameyo bînî Tîmoşenkoyî zî, çinayê sipî day xora. Merasîma ke sûka Cartagena de virazîya, verî lîderê gerîla Tîmoşenko qisey kerd. Tîmoşenko mijdanîya qedîyayişê herbî da û va ‘lej qedîya û ma destpa înşakerdişê haştî kenê.’


15 Serokdewletî û 27 Wezîrê Karê Teberî şahîdîyê kerdî 

Lîderê gerîla qora sifteyin pêro mexdûranê lejî (herb) ra efû wast. Wextê qiseykerdişanê Tîmoşenko de sûkî ser ra tiyareyî perîyay. Ser nayî lîderê gerîla kuşat (yarenî/lexî) kerd û va, ‘na qorî seba bombevornayişê ma nê, seba haştî ameyê. Serokkomarê Kolombîya Juan Manuel Santosî zî cewab da kuşatê lîderê gerîla û va: “Hinî lej çinîyo lej çinîyo. Hinî seba lejî merdiş çinîyo. Hinî gerîlayan guleyê xo, rayanê weçînayina vurnayê û ez no qerarî selam kena.” Santosî peynî de zî, va ‘şima pêro xeyr ameyê miyanê demokrasî.’ Bado zî, pêkerdişê 297 rîpelîn, bi pênûsa ke gule ra virazîyaya, îmze bi. 15 Serokdewletanê welatanê Emerîkaya Latîn û 27 Wezîranê Karê Teberî  zî, şahîdîyê îmzeyanê haştî kerd.


260 hezar ra vêşî kesî merdî 

Serokdewletê Kuba Raul Castro ke, 4 serranê muzakereyanê haştî rê wayirîyê keyî kerd zî merasim de ca girot. Sekreterê pêroyin ê Neteweyê Yewbîyayî û Wezîrê Karê Teberî yê Emerîka John Kerry zî tewrê merasîm bi. Kerry pêkerdişê aştî, zey gama gird hesibna. Temsîlkara Sîyasetê Teber yê  Yewbîyayena Awrûpa Federîca Mogherîn zî aşkere kerd ke iyê pêkerdişê haştî ra dima nameyê FARC lîsteyê terorî ra vejerê.

FARC serra 1964 de, bi îsyanê dewijan dest bi têkoşînî kerd û goreyê reqamanê fermî 7 hezar gerîlayê ci estê. Lejê 52 serrîn de, vêşiyê 260 hezar kesan weşiya xo kerd vinî, 45 hezar kesî bî vinî, 6 mîlyon û 900 kesî, koçber bî. Seba (qandê) ke pêkerdinê haştî fermî bo zî, 2ê Cotmeng de referandûm virazîyeno. No maben de 2. hereketê gerîlayan ê Kolombîya ELN zî seba weşîya referandûmî mabenê 30ê Îlone û 5ê Cotmeng de adirbirnayiş îlan kerd. Hukumeta Kolombîya seba ke bi  gerîlayanê ELN ra zî haştî virazo hedreyînan kena. Nezdîyê hezar û 500 gerîlayê ELN estê. Aşma adar de mabenê hukumeta Kolombîya û ELN de pêdiyayişî virazîyay, la seba muzakereyan tarîx nêdîya.


Hukumeta Kolombîya û FARC senî pêkerd?

Pêkerdişê mabenê hukumeta Kolombîya û gerîlayanê FARC de îmze bi zî yeno meraq kerdiş. Eno pêkerdiş  297 rîpelî yo. Pêkerdiş 2ê Cotmeng de şino referandûmî. Gerîlayanê FARC hefteyo ravêrdî de konferansê netewî de, metnê pêkerdişî tesdîq kerdbi. Konferansî de qerar girotîyabi ke FARC açarîyo hereketekê siyasî.Goreyê pêkerdişî, gerîlayî iyê dê 20 mintiqayanê cîya de are bibê. Peycoy zî 180 rojan mîyan de, iyê dê tifînganê xo teslîmê jû heyeta taybet ê Neteweyê Yewbîyayî bikerê. Çarçoweyê pêkerdişî de, seba ke dewijî bişerê bibê wayirê erdan, qanûnî dê hedre bibê. Eynî wext de, kesê ke mecbûr mendî  keyeyê xo terk bikerê zî, dê bişerê bibê wayirê mal û milkî. Rayê mintiqayê îzole biyê, viraziyê û ê cayan de raveyşiyayin do teşfîq bibo.

Bi sebebê lejî, xeylê mintiqayî teberê tesîrê dewlet de mendîbî. Eynî wext de, seba gerîlayanê verîn teşfîqkerdişê weşîya siyasî zî, mekanîzmayî dê ronîyê. Seba mehkemakerdişê azayanê FARC û lejkerê ke sûcanê giranî ra mesûlîyê zî, jû mehkemeya taybet ê haştî do ronîyo. Kesê ke sûcanê xo îtîraf bikerê û xizmetkarîyê heqîqetan bikerê, dê hurendîya cezayê hepisî, cezayê alternatîfî bidîyo. Semedê mexdûran zî, tezmînat do bidîyo.   

 

NAVENDÊ XEBERAN