Kombîyayîşo 30. yê Grûba Xebate ya Vateyî mîyanê tarîxanê 28-31ê Temmuze 2017î de bajarê Başûrê Kurdistanî Dihok de ame kerdene. Kombîyayîşo ke bi moral û motîvasyonêko germ û baş ame kerdene de termînolojîyê beledîya ser o ame gureyayene.
Seba standardîzekerdişê kirmanckî hewldayîş û xebatê Grûba Xebate ya Vateyî dewam kenê. Nê çarçewayî de kombîyayîşê peryodîkî yê Grûbe ke şeş aşman de reyê ênê kerdene, dewam kenê. Kombîyayîşê peynî zî Başûrê Kurdistanî de ame kerdene.
Grûbe heta nika sûkanê cîya cîyayan yê Kurdistanî de û teberê welatî de 30 kombîyayîşê xo kerdî. Kombîyayîşo peyên yê hîrisin zî bajarê Dihokî de ame kerdene. Goreyê zanayîşê ke ma endamanê Grûbe ra Denîz Gunduzî ra girewtî, 16 endamê Grûba Xebate ya Vateyî tewrê bi kombîyayîşo 30. bîy. Endaman yew het ra Dihok nas kerd, heto bîn ra kî gureyê xo dewam kerd. Kombîyayîşê 30. ke 28ê Temmuze de dest pêkerd, çar rojî dewam kerd.
Termînolojîyê beledîya
Grûba Xebate ya Vateyî heta nika 30 reyî bajaranê cîya-cîyayan ê Kurdistan û ê teberê welatî de kom bîye. Kombîyayîşê 29. mîyanê tarîxanê 27-30ê Hezîrane 2016 de Dîyarbekir de amebi kerdene. Grûbe kombîyayîşê 28. ra no het termînolojîyê beledîya ser o gurîyena. Kombîyayîşê 30. de zî termînolojîyê beledîya ser o ame gureyayene. Heta nika bi seyan termî tirkî ra açarîyê kirmanckî.
Îmza eşte binê xeylê serkewtişan
Grûba Xebate ya Vateyî ke serra 1996 de paytextê Swêdî Stockholm de ronîyaye, o wext ra no het îmza eşte binê xeylê xebat û serkewtişan. Standardîzekerdişê kirmanckî de zaf keda na Grûbe esta. 21 serran mîyan de warê kirmanckî de xeylê hewildayîşê Grûba Xebate ya Vateyî bî. Nê hewildayîşan ra yew zî vetişê Kovara Vateyî yo. Na Grûbe heta nika 52 hûmarê Kovara Vateyî vete.
Weşanxaneyê Grûba Xebate ya Vateyî zî esto. Weşanxane de Kovara Vateyî ra pîya kitabî kî yenê çapkerdene. Serra 2003 ra nat Weşanxaneyê Vateyî de 95 kitabî ameyê çapekerdene. 62 kitabanê kirmanckî ra pîya Weşanxaneyî de bi Kurmanckî, Sorankî, Tirkî û Îngilizkî zî kitabî amey weşanayene.
NAVENDÊ NÛÇEYAN