Li Rojavayê Kurdistanê xebatên pîrozbahiyên cejna Newrozê bi lez didomin. Meclîsa Gel a bajarê Amûdê ji bo nirxandin û amadekariyên cejna Newrozê civînek li dar xist. Çalakî û şahiyên cejna Newrozê ji 16’ê Adarê heta 21’ê Adarê dê berdewam bikin. Di civînê de bang li hemû meclîsên gel hate kirin ku dest bi amadekariyên çalakî û şahiyên cejna Newrozê bikin. Di civînê de her wiha şêwazên kar û amadekirina cihê şahiya mezin û vexwendina partî û rêxistinên bajarê Amûdê hatin gotûbêjkirin.


Xebat bi lez didomin
Civîn bi avakirina 5 komîteyên amadekariya çalakî û şahiyan bi encam bû. Komîteyên hatine avakirin ev in: 1- Komîteya Dîsîplîn: ji 3 kesan pêk tê û erka wan birêxistinkirina ciwanan û dîsîplînkirina wan di cejna Newrozê de ye. 2- Komîteya Dîkor: ji 5 kesan pêk tê û erka wan xemlandina bajêr û kolanên wê û cihê şahiya mezin e. 3- Komîteya amadekirina dika şahiya Newrozê: ji 5 kesan pêk tê û erka wan amadekirina dika şahiyê ye. 4- Komîteya Teknîkê: ji 3 kesan pêk tê  û erka wan çavdêriya ceyran û teknîka roja cejnê ye. 5- Komîteya Mêvanan: ji 5 kesan pêk tê û erka wan pêşwazîkirina mêvanan e. Şahî û çalakiyên cejna Newrozê li bajarê Amûdê ji 16’ê adarê de destpê dikin.

ANHA/AMÛDÊ