Pêr li navçeya Şirnexê Qilabanê li bajarokê Sêgirkê helîkoptêreke artêşa Tirk ket xwarê. Tevî ku hîna diyarnebûye, ka gerîlayan helîkopter daye erdê yan na, Artêşa Tirk bi daxuyaniyeke bi lez îdîa kir ku helkopter bi qezayekê şikest xwariye. Di helîkoptera ketî xwarê de, tevahiya fermandariya operasyona eskerî ya artêşa Tirk a dagirker li çiyayê Katoyê bi rê ve dibir, hebû.
Hat ragihandin ku Tumgeneral Aydogan Aydin ê ku operasyona navbirî li herêma Katoyê bi rê ve dibir jî hebû û ew jî miriye.
Bû tekmîla wî ya dawî
Generalê Tirk Aydin, 28’ê Gulanê di çapemeniya Tirk de xuya dikir. Di dîmenên xwe de, wî teklefonî Serokkomarê Tirk Erdogan dikir û tekmîla xwe didayê. Ha ew tekmîl bû tekmîla wî ya dawî. Tevî generalî bi giştî 13 eskerên Tirk bi ketina helîkopterê re mirin yan jî hatin kuştin.
Helîkopter ji Leşkergeha Jendermeyan a li Sêgirka rabû û ne dûrî wê pêr bi şev ket xwarê. Ji bilî Fermandarê Tumena Sînor a Jendermeyan a 23. a Şirnexê Tumgeneral Aydogan Aydin. Du mîralay, serdarek, çar serpel, pîlotê serekserpêl, du serçawiş, çawişekî pispor jî hebûn. Bi vî rengî jî tevahiya fermandariya komkujiyên li dijî Kurdan a li Botanê ji holê rabû û nema.
Kit ji fermandariyê nema
Herçî generalê Tirk Aydogan Aydin e, wî demekê Fermandariya Tugaya Komando ya Qeyseriyê jî kiriye, ku ev Tûgay yek ji amûrên girîng ên terora dewleta Tirk a li Kurdistanê ye. Her wiha Aydin operasyona 18’ê Nîsanê ya li herêma Çiyayê Kato ya Elkê bi tevlîbûna bi hezaran leşkerên ji Tûgaya Komando a Jandarma a Çakirsogut, Fermandariya Tumena Sînor a Jandarma a 23. û Fermandariya Alaya Jendermeyan a 8. a Elkê destpêkirî jî, bi rê ve dibir.
Aydin roja 28’ê Gulanê dema ku Wezîrê Karên Hundir ê Tirk, Suleyman Soylû çûbû Katoyê, hevaltî pê re kiribû û bi telefonê tekmîl dabû Erdogan.
Lîsteya komkujerên mirî
Navê leşkerên di helîkoptera ketî xwarî de mirî jî bi temamî ev in: Tumgeneral Aydogan Aydin Serheng Oguzhan Kuçukdemîr Serheng Gokhan Peker Serdar Koray Onay
Serpel Songul Yakut Serpel Ilker Acar Serpel Nurî Şener Çawişê pispor Zekî Koç Serpelê Pîlot Serhat Siginak Pîlot serekserpel Abdulmutalîb Kesîkbaş Serçawiş Mehmet Erdogan
Serçawiş Fevzî Kiral Çawişê Pispor ê Piyade Hakan Încekal
NAVENDA NÛÇEYAN