Cigêrayîşê kommezele do tayê rojî dewam bikerê. Roja verêne de 8 qafî ameyî dîyene. agahîyan ra gore na kommezele de endamê di keyeyanê Baran û Cananî amebîyî veşnayene. Rakerdişê mezele de merdimê meyîtan û dozgerî beşdar bîyî. Vatena Baran û Cananan ra gore, 14 tebaxe 1938 di dewa Seka Sûre de 24 kesî hetê eskeranê tirkan ra amebîyî berdene yew axur û uca amebîyî veşnayene.
Hetê lejkeranê ra amayî veşnayene
Bi serran dewlete nêwaşt ke cayê mezele bikino, coka keyeyî vejîyayî dadgehê. Bi biryarê Dadgeha Erzingan û yê Dêrsim ra, nika karê kinitişî dest kerd ci ke nasnameyê cendegan bêrê dîyene. Roja verêne de esteyê verênî ameyî dîyene. Pawitoxê her di keyeyan da zanayene ke “No cigêrayîşê qirkerdişê 1938î yo verên o. Keyeyan ra DNA do bêro girewtene û nîya bi esteyanê ke tîya yenê dîyene, înan de muqayese beno. Bawerîya ma ya ke bi delîlanê mehkemekîyan rastîye vejîna meydan ke tîya cinî, doman û kokimî ameyî qir kerdene. Delîlî do bimusnê ke versîyono resmî yê Komara Tirkîya ke no tena yew xoverrodayîş bî, eslê xo de qirkerdiş o.”
“Ma esteyê baw û kalanê”
Huseyîn Baranî ke tesadufen esteyê verênî dî, vano ke pîrika xo ci ra vatêne ke baw û kalê xo ameyî veşnayene û wina vat: “Ma wazenîme bimusnîme ke nê esteyî esteyê baw û kalanê ma yê. Ma wazenîme înan goreyê erf û edatanê xo wedarê. Ma gorristanê înan wazenîme.”
Sevîm Gurtaş qal kerd ke a wextê qirkerdişî de 6serrîya xo de bîye û wina peynî kerd: “Înan miletî ardî tîya. Tepîya, ma adir dî. Kesî besenêkerd şêro nêzdîyê ê cayî. Her kes remayêne.”
DÊRSIM