Di sergêraya komploya Mîyanêneteweye de gerîlayê HPGe dîyar kerdî ke têkoşîna Rayverê Şarê Kurd Abdullah Ocalan û şarê kurd komplo vila vet, bi paradîgmayê Modernîteyê Demokratîk heme hewldayişê hêzê komplogeran vila vejîya. Gerîlayan di çalakîyê ‘Şima nêeşkenî Rojê ma tarî bikerî’ de keseke cuya xo dayî yad kerdî.
Gerîlayê HPGe Ronî Kirmanşan komploya 15 Sibate ser vat ke hêzê komplogeran bi komploya 15 Sibate waştê xoverodayiş û têkoşîna şarê kurd çin bikerî û vila bivejenî. Kirmanşan aşkera kerd ke verê komploye zî ser şarê kurd polîtîkayê helênayiş û çinkerdişî ameynê şuxulnayiş û waştê bi na komploye polîtîkayê xo leyminî ra netîce bigêrî.
Kirmanşah wina vat: “Rayver Apo verba modernîteya kapîtalîst di Îmralîye de teorî û îdeolojîyê xo xeql kerd û nika Îmralî seba Rayverê Şarê Kurd yew dibistan o. Modernîteya Demokratîk nika pêroyina dinya û çar parçeyê Kurdistanî de elaqayeke gird vîna û bi no xoverodayişî zî komploya 15 Sibate vila vejîya. Pêroyina dinyaye de kurdî verba na komploye çalakîyan dar vistî. Ma zî xobixo zey mîlîtanî Rayver Apoyî vînenî û hesabê na komplo zî do bêro persayiş.”
Sîrwan Soma zî verê qise xo bertekê hêzê komplogeran mojna û wina dewam kerd: “Ma do bi têkoşîn û xêzê Rayverê Apoyî de xo resayişî de komploye ra verpers bidî. 15 Sibat seba şarê kurd û Kurdistanî rojake tarî û bi dej o, na komplo şaxsê Rayver Apoyî de şarê kurd û heme şaran ame kerdiş. Komplogeran qet di Kurdistan û Rojhîlatê Mîyanê de averşîyîşê şaran nêwazenî û no ser zî ona komployake gird viraştî.”
Armancê leymin
Erdal Melezgîrt zî bal ont armancê komploye û ard ziwan: “Armancê komplogeran dergkerdişê şerî bi û no ser na komploye viraştî. Seba şarê kurd û gerîlayê esaretê Rayver Apoyî zaf bi giran bi. Çika deja ma gird zî bibo, ganî bike ma têkoşîna xo gird bikerdî, şarê ma komplogeran ra verperseke muhîm û gird da û gerîla zî wezîfeyê xo kerd.”
Harûn Endîwer zî ciresna ke keseke eke xo ra merdim vano se; roja 15 Sibat seba no merdim zî rojake tarî yo, hêzê kompleran xo ra Tevgera Azadîye teluke vînayî û no ser zî na komploye viraştî. Rayver Apo na komploye vila vet, do ma komplogeran ra hesap bipersî.
Berxwedan zî ciresna ke qet verba komploya 15 Sibate şarê kurd bê veng nêvindertî û têkoşîna bê hempa verba kompgeran mojnayî, hetanê nika her tim fikrê Rayverê Apoyî hêzê kapîtalîst xo ra teluke vînayî.
ANF/BEHDÎNAN
Ergîn: Tena muhatap Ocalan o
Nê 17 serra ke Rayverê Şarê Kurd Abdullah Ocalan di Îmralîye de di binê tecrîde de yo la Ocalan di Îmralîye de verba zîhnîyeta faşîst bi tez û paradîgmayê xo verpers da. Komploye ser hemsereka DBPa Dêrsime Ergîn Dogru aşkera kerd ke nika şarê bindestê bi tez û paradîgmayê Ocalan xobixo newe ra xelq kenî.
Ergîn wina vat: “Armancê esil komploye tasvîyeya Tevgera Kurd bî û waştê şarê kurd bivisnê statuya koleyî la heme nê polîtîkayê leyminî Rayverê Şarê Kurd Abdullah Ocalan vila vet. Hema zî hêzê komploger wazenî komploye bidomnî la seba ke Tevgera Kurd têkoşîna bê hempa dana no ser nêeşkenî na komploye hîna aver berî. Armancê înan şerî sewbî merheleye ra vistiş bî. Her kes bizano tena muhatap Rayverê Şarê Kurd Abdullah Ocalan o. Ocalan omidê heme şarê bindestî yo.”
Ergîn dîyar kerd ke êdî Rayverê Şarê Kurd Abdullah Ocalan tena şarê kurd nê heme şarê bindestî ra keseke çimeyanê omid o, eke di na welate de aştî yeno se waştiş, ganî îradeya şarê kurd Abdullah Ocalan muxatab bêro girewtiş, çimkî bê Ocalanî çareserî çin o.
DÎHA/DÊRSIM