Îtiqatê alewiyan de rolê ceniyan
Ayten Şîmşîr moderatoriya roniştenê ‘Îtiqatê Raya Heqî de rolê ceniyan ser û ard zon ke, raya werte ra wedarnayişê xiravînan, ceniya ke wayrê fikir û felsefeyê Ana Fatma ya ra vîreno ra. Şîmşîr aşkere kerd ke, gune vera zihnîyetê serdest, tekoşînê ceniyan dewam bikero.
Derheqê babed de, Hemseroka Komeleyê Alewiyê Demokratîk yê Enqera Songul Çelîk kî qisey kerd û hayr ant rexmê qirkerdinan, heta ewro ameyişê îtiqatê alewitî de rolê ceniyan ser. Çelîk diyar kerd ke, felsefe û îtiqatê cuwyayişê alewiyan de, tesîrê ma û ceniyan zaf muhîm o. Çelîk vatişê ‘alewiyan de têdûştî ya cenî û camêrdî esta’ vist vîrî û aşkere kerd ke, na vatiş raştiyan rê çimê xo girotiş o. Çelîk diyar kerd ke, zihnîyeta serdest her ke sona, sazgehanê alewiyan de kî bena jêde. Çelîk aşkere kerd ke, îxtidara nikayî welat kirêşena Îslama Sûnî û vera nay hayr ant hewcedariyê berzkerdişê tekoşîn ser. Gune alewî vejerê teberê şîndoranê sûnî û vera nay tekoşîn bikerê. Hemseroka DAD’ê Songul Çelîk hayr ant makeqanûna newî ser û va, serva makeqanûna newî ya demokratîk û azad, gune alewî piya hereket bikerê.
Kiltûrê alewî sûkan de beno vindî
Hemseroka Komeleyê Alewiyê Demokratîk yê Îzmîr Meryem Çakmak kî hayr ant sîstema kapîtalîst ser û persa, ‘no sîstemî de ceniyê alewî çi qe estê, îtiqatê xo çiqe zanê û domananê xo ra danê zonayen’ kerd. Çakmak vist vîrî ke kiltûrê alewî sûkan de beno vindî û niya qisey kerd: “Camêrdê alewî kî bi vatenê ‘alewitî de cenî azadê’ bi sîstema serdest kenê hepsê çê. Gune alewiyê ke metropolan de cuwyenê, kiltûrê xo domananê xo ra bidê zonayen.
Roniştena ‘Îtiqatê Raya Heqî de vizêr û ewroyiya kiltûr û îtiqatî’ de Hemserokê Komeleyê Alewiyê Demokratîk yê Stenbol Bulent Felekoglû qisey kerd û vist vîrî ke alewitî cewherê xo, çêkûyanê xoza û zaîn ra giroto. Felekoglû ada zonayen ke, kiltûrê Ocaxî de Pîr, yanî Roj sifte yeno û va, “alewitî modelekê bê qisûr o. Alewitî de zihnîyetê ciyakerdiş çinyo û herkes ‘can’ o.
Badê qiseyan komxebatê Pîr’an bi wendena dûa, bi fiştrayena çira û bi wendeka gulbangan qediya.
DÎHA/DERSIM