Konferansê Krîzê Rojhelatê Mîyanênî û Çareserîya Neteweya Demokratîke ke 2 rojî dewam kerd, qedîya û vilaweka netîceyî ameye aşkerekerdene. Sere de Hemserekê Pêroyî yê HDPyî Pervîn Buldane û Sezaî Temellî û xeylê nuştox, roşnvîr, rojnameger, sîyasetmedar, aktîvîst û sewbîna kesî beşdarê konferansî bîyî.
Vilaweka netîceyî hetê Parlamenterê HDPyî yo kehen Ertugrul Kurkçuyî ra ame wendene. Kurkçuyî dîyar kerd ke înan ser persanê ‘Ganî çi bêro kerdene, senî bêro kerdene û kura ra dest pêbikero?’ ra munaqeşeyî temam kerdî. Vilaweke de ca dîyayo qerarê ke ameyî girewtene. Vilaweke de dîyar bîyo ke konferans çareserîya demokratîke wazena û heme krîmînalîzebîyayîşê prosesî red keno.
Vilaweke de qala azadîya Rayberê Şarê Kurdî Abdullah Ocalanî ameya kerdene û ameyo vatene ke konferans awanbîyayîşê şertanê azadan yê Birêz Ocalanî pêşnîyaz keno. Reyna vilaweke de bale ancîyaya yewîya kurdan ser û dîyayo zanayene ke konferans seba yewîye veng dano herkesî. Vilaweke de awanbîyayîşê Cepheyê Yewîya Demokratîke ameyo pêşnîyazkerdene.
AMED