Seba vengdayişê viraştişê Kongreya Neteweyî yê Kurdistan ê Hemserokîna Konseya Rayverîn ê KCK ke 8ê Kanûne de kerd destegî ramenê. Başûr, Rojhelat û Rojawayê Kurdistanî ra pîya Bakûrê welatî ra zî piştîdayîşî yenê.
Vera çehar leteyê Kurdistanî hêrîşê pîlî benê û dewleta Tirkîye ra pîya quwetê mavên neteweyî wazenê bi nê hêrişan ra pîya pêrokîn qezencanê kurdan werte ra wedarnê. Seba ke Kurdî qada mavên neteweyî û dinya de bibê wayîrê vatişî, serra 2013î de Hewlêr de seba hadreyînê viraştişê Kongreyê Neteweyî bi tewrbîyayişê temsîlanê çehar leteyanê Kurdistan kombîyayîşeke tarîxî virazîya. La rîwalê tayî sebeban kongre nêvirazîya û nêresya netîce. La nê wextanê peynî de muxetabê sîyasî yê rêxistin û partîyanê Kurd seba viraştişê kongre kewtê hereket.
Hemserokîna Konseya Rayverîn ê KCK seba viraştişê kongre 8ê Kanûne de veng da pêrokîn partî û dezgehanê Kurd. Seba na vengdayişî her ke şino destegî benê berz. Partîye sîyasî û dezgehanê vakûrê Kurdistanî ra zî seba vengdayiş desteg ame.
Qonaxa bîyayiş û nêbîyayîşî ya
Endamê Dîwana Serokîna Kongreyê Civaka Demokratîk (KCD) Musa Farisogullari vist vîrî ke seba ke Kongreyê Neteweyî nêvirazîyo dewletanê dagirker xêlê dek û dolabê girdî kaykerdî. Farisogullari aşkere kerd ke kongre ra vêşêr menfeatê sîyasî kewtî ver û menfeatê yewbîyayîşî esas nêamey girotiş, nayî ra kongre nêvirazîya. Farisogullari hayr ant vengdayişê KCK ser û wina va: “Vengdayîşê Kongreyî ra pîya, ma nika qonaxeke zaf muhîm ra ravêrenê. Rexmê tekoşîna 50 serran, nika talokeyê girdî vernîya çar leteyanê Kurdistanî de estê. Wazenê pêrokîn qezencanê Kurdan îşgal bikerê. Na qonaxa ke ma mîyan ra ravêrenê, qonaxa bîyayiş û nêbîyayîşî ya. Eke yewbîyayîşê pêrokîn Kurdistanî nêvirazîyo, do pêrokîn qezencê çehar leteyanê Kurdistanî vinî bibê. Ganî Başûrê Kurdistan talokeyê vernîya Kurdistanî rind bivîno û hina nezdîye kongreyê neteweyî bibo.”
‘Wext wextê pêkerdiş o’
Musa Farisogullari dîyar kerd ke zey KCD ê omid kenê ke vengdayîya peynî ya seba Kongreyê Neteweyî cayê xo bigîro û va, ‘Wext wextê pêkerdiş û fikrê wertax yê şarê Kurd o.” Farisogullari vist vîrî ke eke yewbîyayîşê Kurdan virazîyo, do pêrokîn planê îşgalkaran yê Kurdistan pûç vejîye û wina dewam kerd: “Qe nêbo zî ganî ma bîrê têlewe û problemanê xo qisey bikerê. Hinî heqê kesî Kurdistan de çîn o ke vajo wa Kongreyê Neteweyî nêvirazîyo.”
Farisogullari veng da pêrokîn partî û dezgehanê Kurdistanî ke wextekê kilm de têlewe bibê, talokeyê ser hardê Kurdistan veng vejê û ray nêdê îşgalkaranê Kurdistan. Peynîya qiseyanê xo de zî Farisogullari ard zon ke hewcedarîya Kurdistan bi statuyeke pêroyî û xopawitişê wertex esto.
‘Wextê pratîkî yo’
Kordînatora Tevgera Azadî Duysal Karataş zî hayr ant plananê qilêrîn (leymin) yê vera Kurdan ser û aşkere kerd ke seba vindernayişê hêrişanê vera Kurdan ganî tewrê pêrokîn dezgeh û partîyan zelal bo. Karataş ard ziwan ke zey Tevgera Azadî ê Kongreyê Neteweyî yê Kurdistanî rê hadre yê û wina dewam kerd: “Hinî wextê hewnî ra aya bîyayişê Kurdan ameyo. Wextê rakewtişî nîyo. Feydeyê ti dewletan ma rê çîn o. Tirk, rom, faris û yê bînî vera Kurdan bîye yew. Herkes hêrişê Kurdan keno. Wext wextê xurtkerdişê yewbîyayîşê Kurdan o. Kongre bi vatişan nêbeno, pratîk û teorî lazim o.
Karataş veng da PDK ke pratîkî de hewldayenanê viraştişê Kongreyê Neteweyî de ca bigîro û wina va: “Ganî pêrokîn Kurdî Tirkîye û dewletanê bînî het de nê, yewbînî het de ca bigîrê.”
BÎLAL GULDEM / DÎHABER / AMED