RONÎ ARAM / ANF / STENBOL
Krîzê ekonomîke ke Tirkîya de esto, heme hetê cuye de xo nîşan dano. Bitaybetî zêdebîyayîşê dovîzî ver çîyê ke teber ra yenî herînayene, vaya înan zêde bîya. Nînan ra yew zî kaxiz o.
Zêdebîyayîşê vaya kaxizî ver hewteyo bîn tayê rojnameyî rojê xo yê çapkerdişî kêmî kerdî yan zî rîpelê xo kêmî kerdî. Babete ser o Derhênerê Pêroyî yê Rojnameyê Evrenselî Fatîh Polat, Wayîrê Îmtîyazî yê Rojnameyê Bîrgunî Îbrahîm Aydin û Berpirsîyarê Karê Îdarî yê Rojnameyê Yenî Yaşamî Mehmet Şahînî qisey kerdî.
Polatî va ‘seba ke fabrîkayê kaxizî ameyî padayene, vaya kaxizî ewro zaf zêde bîya’ û wina domna: “Serra 94î de zî rewşêka winasî ameye cuyayene. Labelê o wext fabrîka SEKA hîna nêameybî arizî kerdene. Cok ra SEKAye nêverda welat tesîr bibo. Eke ewro SEKA bibîyêne, wina nêbîyêne. Goreyê ma krîzê kaxizî zî sansurêk o û sey zextanê bînan ma ser o yo. Ganî kaxiz bêro xelq kerdene û bacî nêgirîyî.”
Muxalîfî tesîr benî
Aydinî va ‘krîzê kaxizî newe nîyo û aşma gulane ra nata esto’ û wina dewam kerd: “Ma probleman ver mecbûr mendî vaya rojnameyî zêde bikerî. Wa wendoxê ma weş bî, wayîr vejîyenî. Na rewşe ra tena rojnameyê muxalîfî tesîr benî, çimkî karê ma tena rojnamegerîye yo. Hukmat ma sey yê ke bêrî çinî kerdene, vîneno.”
Yeno hesabê îqtîdarî
Şahînî zî da zanayene ke çapemenîya azade nê krîzî ra tesîr bena û wina va: “Eke kaxizê destê ma biqedyî, ma do zehmetîyan biancî. Ma zî vaya xo zêde kerd û pêşkêşê wendoxê xo kerd. Beno ke ameyoxe de ma rîpelan zî kêmî bikerî. Heto bîn de na rewşe yena karê îqtîdarî û îqtîdar seba bêvengkerdişê îqtîdarî bikar ano. No zî bi hawayêkê bêvengkerdişê muxalîfan o.”