Konseya Serekîye Pêroyî yê KCK, PAJK û PKK zî bi îzahatêko nuştekî Komployê Mîyanneteweyî ke 15ê Sibate 1999î de vera Rayverê Şarê Kurd Abdullah Ocalanî virazîya lanet kerd. Îzahatan de vajîya ke ‘Kurdî bêçare nîyê’ û dê heta merdişî wayîrê ameyoxa xo bivejyê.
Konseya Serekîye Pêroyî yê KCK vist vîrî ke ser bêbextîya verra Rayverê Şarê Kurd Ocalanî ra 18 serrî ravêrdî. KCK aşkere kerd ke sîyaseta qirkerdişî ya ke dewleta Tirk bi serrano seba înkar û îmhaya Kurdan da ramiten, bîya sebeb ke kurdî pêroyîya seserra 20. de mîyanê xoverdayîş û îsyanî de bê.
Îzahatê KCK de hayr ancîya emelê komplogeran ser û wina vajîya: “Armancê tewr gird yê Komployê Mîyanneteweyî no bi ke kurd zey netewe bi îrade û azad nêkewê seserra 21. Bi no hewayî waştî ke goreyê kêfa xo Rojhelatê Mîyanên goreyê menfeatanê xo newe ra dîzayn bikerê. Rayber Apo û Hereketê Serbestî ver menfeatanê xo de zey astengî dî. Şarê Kurd û Rayver Apo enê plananê qilêrîn veng vet.” KCK da zonayen ke ewro bi îtifaqa AKP-MHP û mutefîqê ci yê mîyanneteweyî komplo reyna germ kerdîye û ardîye rojdem û va, ’Sîyaseta rojane ke ser Îmrali ferz kenê, sîyaseta bê qanûnî ya.
‘AKP sûc keno’
Konseya Serekîye Pêroyî yê KCK da zonayen ke dewleta kolonyalîst ya tirk, esareta Ocalanî her tim vera şarê kurd û hereketê azadî zey sîyaseta tehdîdî şixulna û aşkere kerd ke ti şansekê bîn yê Tirkîye teberê çarekerdişê meseleya kurd û demokratîkbîyayîşî nêmendo.
KCK vist vîrî ke bi sîyaseta faşîzan û qirkerdişî, kaos xorîn beno, welat vera welişnayişî şono va, ‘Wa herkes bizano ke kurdî bêçare nîye’. KCK 5 serrîyo manîkerdişê pêdiyayişan zey sûc hesibna û hayr ant referandûmî ser. Konseya Serekîye Pêroyî yê KCK aşkere kerd ke demokrasîya Tirkîye prosesê referandûmî de ganî faşîzma AKP-MHP rê vajo Nê.
Îzahatê KCK de hayr ancîya têkoşînê şarê kurd ser û wina vajîya: “Rewşa nikayî de şarê kurd, bîya wayîrê îrade ke Komployê Mîyanneteweyî û esareta Îmrali biqedîno. Serbestîya Rayber Apo rojdema şarê ma de ya. Şarê kurd do heta merdişî wayîrê ameyoxa xo bivejyo. Peynîya îzahatî de KCK aşkere kerd ke bi têkoşîneke gird dê serbikewê.
‘Roja qirkerdişê kurdan a”
Partîya Azadîya Cinîyanê Kurdistan PAJK zî bi îzahateko nuşteyî komplogeran rê nêrazîbîyayiş damûsna.PAJK vist vîrî ke iyê dê bi vindertiş û nûmayişanê xo cewab bidê komployî û va, “Zey cinîyê girêdayê PAKJ ma na roj qet xo vîra nêkerd û ma dê xo vîra nêkerê. Zey hereketa cinîyan ma soz danê, ke dûştê na roja sîya û xayîn, ma dê têkoşîna azadî hera bikerê.”
Vera serragêra Komployê Mîyanneteweyî jû nêrazîbîyayiş zî Komîteyê Rayverîn ê PKK ra amê. PKK 15'ê Sibate zey “Roja qirkerdişê kurdan" bi name kerd û va, ‘ma her cayî seba serbestîya Rayver Apoyî bikerê qadê tekoşînî. Komîteyê Rayverîn ê PKK peynîye îzahatê xo de veng da pêrokîn şaranê Kurdistanî û Tirkîyeyî ke tewrê kampanyaya referandûmî bibê û faşîzmê AKP-MHP rê vajê nê.
ANF/BEHDÎNAN