Sozê perskerdişê hesabî
Dewleta tirk 29ê Hezîran a 1925 de, Şêx Seîd û 47 embazê ci, Amed de îdam kerdîbî. Bi wesîleyê serraçarnayişî merasimê vîrardin virazîyenê. Merasîman de sozê perskerdişê hesabê îdaman û komkiştenan ame dayen.
Merasîmê Amedî de, meydanê Şêx Seîd de virazîya. Komeleyê Şêx Seîdî rayverînê merasimî kerd û nunerê xeylê saziyan tewr bî. Merasimî de posterê Şêx Seîdî abîya û nameyê heme 47 embazanê ci yê ke pîya îdam bî zî, jew bi jew wanîya.
Şar xo vîr ra nêkeno
Serokê Komeleyê Şêx Seîdî Kasim Firat'î merasimî de qisey kerd û vist vîrî ke, şarê kurd kesê ke serva şarî ganê xo feda kerdo, xo vîr ra nêkeno. Firat'î eleqe ant siyasetê kiştenan ê dewleta tirk ser û vat: “Dewleta tirk serra 1925î de kurdî kiştî, nika zî kurdan kişena. Wa herkes nay bizano, bi kiştişan nêşenê kurdan biqedînê. Verê 91 serran dewlet kurdî kiştî, la belê mayê nika ancî tiya de yê.” Kasim Firat'î qalê muhîmînê xoverdayişê kurdan zî kerd û va: “Koyan de, zîndanan de, sûkan û heme cayê dinya de kurdî estê. Wa îşgalkerî nay rind bizanê, senî dîktatorê zalimî verê 91 serran nêresay hedefê xo, ewro ra tepîya î, nêşenê biresê hedefê xo.
Tenya amed û vakûrê welatî de nê, xeylê cayanê teverê welatî de zî, merasimê vîrarden virazîyayî, Şêx Seîd û embazê ci vîr amey. Pêrokîn merasîman de sozê ca ardişê tekoşîn û emelanê ci ame dayen.
DÎHA/AMED