Ziwanê Kurdî de îzehet dayî. KNKyî veng dayo heme kurdan ke wa vera zîhnîyeto qirker de herkes mîyanê seferberîye de bibo. 15ê Gulane Roşanê Ziwanê Kurdî yo û bi wesîleya na roje her serre aktîvîteyê cîya cîyayî yenî viraştiş. Çarçewaya na roje de her serre panel, konser, rayîrşîyayîş, sînema, tîyatro û sewbîna yenî viraştiş. Emser zî xeylê cayan de bi hawayo coş ame pîrozkerdiş. Babete ser o Merkezê Komelê Kurdê Demokratîke yê Almanya (NAV-DEM), Komîsyonê Perwerde, Kultur û Edebîyatî yê Kongreya Neteweyîya Kurdistanî (KNK) îzehetê nuştekî dayî, Serekê Enstîtuyê Kurdî Samî Tanî qisey kerd. NAV-DEMî veng da cinî û ciwanan ke wa bi ziwanê xo yê dayîke qisey bikerî û wina vato: “Ganî bi ziwanê xo bifikirê û qisey bikerî. Ma veng danî heme şarê xo ke wa bi ziwanê xo yê dayîke qisey bikerî û wayîrê kulturê xo bivejîyî. Wa şarê ma vera zîhîneto ke ziwan û kulturê ma qedexe keno de sere wedarnî. Wa weçînayîşê 24ê Hezîrane de heme dezge, dost û dormeyê ma şêrî sindoqan ser û rayanê xo bixebetnî. Ganî ma her ca de ziwanê xo bikar bîyarî Komîsyonê KNKyî îzehetê xo de qala muhîmîya kovara Hawarî kerda û wina vato: “Na kovare vera qirbîyayîşê kurdan de reaksîyonêk a û seba şarê kurdî zaf muhîm a. Ma Roşanê Ziwanê Kurdî sere de heme dayîkan rê û heme kurdan rê pîroz kenî. Herçiqas ke hende hêrişî estî labelê reyna zî ziwanê kurdî Vakurê Kurdistanî de ameyo dûştê hilmgirewtişî. Ewro lehçeye Hewramî û Kirmanckî (Dimilkî/Zazakî) çinîbîyayîşî reyde têrî yî. Ganî ma seba ke ziwanê ma vînî nêbo, mîyanê seferberîye de bibî.” Rêjeya qiseykerdişî kêmî bena Heto bîn ra Serekê Esntîtuyê Kurdî Samî Tanî zî derheqê zextê ke ziwanê kurdî ser o estî de qisey kerd û melumatê muhîmî pare kerdî. Tanî va ‘herême de xeylê mekteban de kaxitê ke ser o ‘ez do kurdî qisey nêkera’ nusîyaye yî, yenî aliqnayîş’ û wina domna: “No zî nîşan dano ke kurdî bi temamî ameya qedexekerdiş. Labelê ê se bikerî zî sernêkewenî. Wexto ke merdim ewnîyeno komel de rêjeya wendiş û nuştişî zêde bena, labelê heto bîn de rêjeya qiseykerdişî kêmî bena. Cok ra ganî her hetî ra têkoşîn bêro dayîş.” MA/ANQARA